सुतळी बॉम्बप्रकरणी संशयीत आरोपीस अटक

मातोळा तालुक्यातील जाळपोळप्रकरण; आरोपींस १५ दिवसांची न्यायालयीन कोठडी.

धामणगाव बढे (बुलडाणा) : येथे ३ जानेवारीच्या पहाटे झालेल्या वाहन जाळपोळप्रकरणी संशयित आरोपी म्हणून एका युवकास अटक केली. त्यास न्यायालयात हजर केले असता न्यायालयाने १५ दिवसांची न्यायालयीन कोठडीत ठेवण्याचे आदेश दिले आहेत. मोताळा तालुक्यातील धामणगाव बढे पोलिसांनी दिलेल्या माहितीनुसार वाहन जाळपोळप्रकरणी धामणगाव बढे येथील युवक मंगेश अरुण शहाणे (वय २२) यास १३ जानेवारीच्या रात्री संशयीत आरोपी म्हणून कलम ४३५ अन्वये गुन्हा नोंदवून अटक केली. या युवकास १४ जानेवारी रोजी पोलीस कोठडीसाठी हजर करण्यात आले. यावेळी न्यायालयाने त्यास १५ दिवसांची पोलीस कोठडी सुनावली आहे. धा.बढे येथे तीन जानेवारीच्या सकाळी परवेज अबुबकर पटेल यांची स्कार्पिओ गाडी, दुचाकी वाहन जाळण्यात आले होते तर त्यांच्या घरासमोर जिवंत सुतळी बॉम्ब सापडला होता. या प्रकरणामुळे संपूर्ण जिल्ह्यात एकच खळबळ उडाली होती. तर गावात श्‍वान पथक, बॉम्ब शोधक पथक तथा वरिष्ठ पोलीस अधिकार्‍यांनी दिलेल्या भेटीमुळे गावाला छावणीचे स्वरुप प्राप्त झाले होते. तर येत्या १0 दिवसांपासून मात्र पोलीस तपासाच्या बाबतीत अंधारात चाचपडत असल्याचे जाणवते. आता सदरहु युवकास संशयीत आरोपी म्हणून अटक केल्यामुळे काय निष्पन्न होते, याकडे ग्रामस्थांचे लक्ष लागले आहे.