प्राथमिक आरोग्य केंद्रावरील लिपिक निलंबित

मासिक वेतनामध्ये भ्रष्टाचार.

बुलडाणा , दि. ५- जिल्हा परिषद मुख्य कार्यपालन अधिकार्‍यांनी वरवंड येथील प्राथमिक आरोग्य केंदावरील कार्यरत कनिष्ठ लिपिकास कर्मचार्‍यांच्या मासिक वेतनामध्ये भ्रष्टाचाराच्या आरोपाखाली निलंबित केले आहे.
तालुक्यातील ग्राम वरवंड येथे जिल्हा परिषद अंतर्गत प्राथमिक आरोग्य केंद्र चालते. या केंद्रावर कार्यरत कनिष्ठ लिपिक जी.एस.राजुरकर यांच्यावर कर्मचार्‍यांच्या मासिक वेतनाच्या बिलामध्ये भ्रष्टाचार केल्याचा आरोप होता.
केंद्रावरील वैद्यकीय अधिकारी डॉ.राठोड यांना सदर प्रकार लक्षात येताच त्यांनी यासंदर्भात जिल्हा आरोग्य अधिकार्‍यांकडे तक्रार केली. त्यानंतर चौकशीअंती जि.प. सीईओ दीपा मुधोळ यांनी लिपिक जी.एस.राजुरकर यांना निलंबित केले आहे. यामध्ये जवळपास दोन लाख रुपयांचा भ्रष्टाचार समोर आला आहे. याप्रकरणी आणखी चौकशी केल्यास मोठे घबाड समोर येण्याची शक्यता आहे. त्यामुळे या प्रकरणाची आणखी चौकशी करण्याची मागणी होत आहे.