साडेतीन लाख हेक्टरवर पेरणी

बुलडाणा जिल्ह्यात ४६ टक्के पेरणी; आठ दिवसांत पेरणीची टक्केवारी वाढली.

बुलडाणा : जिल्ह्यातील बहुतांश शेतकर्‍यांनी पेरणीपूर्व मशागतीची कामे संपवून पेरणीचे नियोजन केले आहे. काही तालुक्यांमध्ये पावसाने दमदार हजेरी लावल्यानंतर गत आठ दिवसांत जिल्ह्यातील पेरणीची टक्केवारी वाढली. जिल्ह्यात खरीप पेरणीच्या एकूण ७.४८ लाख हेक्टर क्षेत्रापैकी ३ लाख ४१ हजार हेक्टर क्षेत्रावर म्हणजेच ४६ टक्के पेरणी पूर्ण झाली आहे. यात सोयाबीनची सर्वाधिक १ लाख ९२ हजार हेक्टरवर पेरणी करण्यात आली. कृषी विभागाकडून खरीप हंगामाचे नियोजन करण्यात आले आहे. त्यानुसार एकूण पेरणी क्षेत्रापैकी १५ जुलैपर्यंत जिल्ह्यात ९८ टक्के खरिपाची पेरणी होण्याची शक्यता कृषी विभागाने दर्शविली आहे; मात्र १ ते १७ जूनपर्यंत सर्व १३ तालुक्यांमध्ये पडलेला सरासरी पाऊस ६८.१ टक्के एवढाच होता. त्यामुळे केवळ ५५ हजार ३0५ हेक्टर क्षेत्रावरच पेरणी झाली होती. त्याची टक्केवारी सात एवढी नोंदविली गेली; मात्र कापूस व सोयाबीन ही पिके वगळता इतर पिकांच्या पेरणी क्षेत्रात अद्यापही वाढ झाली नाही. गत काही दिवसांत जिल्ह्यातील बर्‍याच तालुक्यांमध्ये पावसाने सरासरी गाठली. जिल्ह्यात आजपर्यंत १४८३.७0 मिलिमीटर एवढा नोंदविला गेला असून, त्यांची सरासरी ११४.१३ टक्के एवढी आहे. आठवड्याभरात तेराही तालुक्यांमध्ये पावसाने दमदार हजेरी लावल्यामुळे बर्‍याच ठिकाणी शेतकर्‍यांनी पेरणीचा मुहूर्त साधला. सोयाबीन आणि कापूस यांच्यासाठी हा पुरेसा पाऊस असल्यामुळे या पिकांचे पेरणीक्षेत्र वाढले आहे; मात्र ज्वारी, बाजरी, मका, तूर, उडीद, भुईमूग, मूग, तीळ, सूर्यफूल, ऊस या पिकांच्या पेरणीचे अपेक्षित उद्दिष्ट पूर्ण करण्यासाठी जिल्ह्यातील शेतकर्‍यांना आणखी दमदार पावसाची प्रतीक्षा असल्याचे चित्र आहे.

*सोयाबीनची ९२ टक्के पेरणी पूर्ण

        जिल्ह्यातील १३ तालुक्यांमध्ये यावर्षी सोयाबीन पेरणीसाठी २ लाख १८ हजार ३00 हेक्टरचे नियोजन करण्यात आले आहे. त्यापैकी ९२ टक्के पेरणीचे उद्दिष्ट शेतकर्‍यांनी गाठले असून, २५ जूनपर्यंत १ लाख ९२ हजार २0२ हेक्टर क्षेत्रावर पेरणी करण्यात आली आहे. २ लाख ४४ हजार ४00 हेक्टरवर कापसाचे नियोजन असताना ९१ हजार ९६ हेक्टर क्षेत्रावर पेरणी झाली. म्हणजे ३७ टक्के पेरणीचे उद्दिष्ट साध्य झाले आहे.