दगडवाडी ग्रामस्थांचा बैलगाडी मोर्चा

शेतरस्त्याच्या मागणीसाठी ग्रामस्थांचे आंदोलन.

देऊळगावराजा (जि. बुलडाणा) : तालुक्यातील ग्राम दगडवाडी येथे ४५, ३६, ३२, ४0 क्रमांकाच्या गटातला रस्ता अडविण्यात आला आहे. तो रस्ता त्वरित मोकळा करून देण्यात यावा, या मागणीसाठी दगडवाडी ग्रामस्थांनी २७ ऑगस्ट रोजी तहसील कार्यालयावर बैलगाडी मोर्चा काढला. येथील पूर्वीचा शेतरस्ता ग्राम दगडवाडी येथील काही लोकांनी बळजबरीने अडविला आहे. त्यामुळे सदर गटक्रमांकातील शेतकर्‍यांना आपल्या शेतामध्ये जाण्यासाठी रस्ता राहिलेला नाही. यामुळे शेतकर्‍यांच्या बैलगाडी शेतापर्यंत नेता येत नाही. त्यातच रस्त्यात मध्ये असलेल्या नदीला पूर आल्यानंतर पाणी ओसरेपर्यंत वाट पहावी लागते. काही दिवसांपूर्वी नदीमधून रस्ता ओलांडताना एक महिला शेतकरी पुरामध्ये वाहून गेल्याची घटना घडली हो ती. सदरचा रस्ता त्वरित मोकळा करून देण्यासाठी १६ जुलै रोजी एसडीओ कार्यालय सिंदखेडराजा यांच्याकडे तक्रार करून न्याय मागितला होता तसेच न्याय न मिळाल्यास ग्रामस्थ आंदोलन करतील, असा इशारासुद्धा देण्यात आला होता. शासनाने दखल न घेतल्याने अखेर दगडवाडी ग्रामस्थांनी देऊळगावराजा तहसीलसमोर बैलगाडी मोर्चा काढून उपोषणास प्रारंभ केला आहे.