चैत्र पौर्णिमेला गर्दीने फुलणारी रेणुकानगरी यंदा सुनीसुनी !

शहराचे आराध्य दैवत रेणुका देवीच्या वासंतिक नवरात्रोत्सव व यात्रा महोत्सवानिमित्त दरवर्षी चिखलीत राज्यातील लाखो भाविक येतात. यामुळे शहरातील सर्व रस्ते गर्दीत हरवून जातात. कोरोनाच्या वाढत्या प्रादुर्भावामुळे गतवर्षाप्रमाणे यंदाही आराध्य दैवत श्री रेणुकादेवीची चैत्र पौर्णिमा यात्रा रद्द करण्याचा निर्णय प्रशासन व संस्थानच्या विश्वस्त मंडळाने घेतला आहे. त्यामुळे मंदिरात वासंतिक नवरात्रोत्सव काळात दरवर्षीप्रमाणे विधिवत पूजा पार पडल्यानंतर चैत्र पौर्णिमेला सकाळी महापूजा मोजक्या भाविकांच्या उपस्थितीत पार पडली. प्रशासन व संस्थानच्या आवाहनानुसार मंदिरात भक्तांची वर्दळ पूर्णत: थांबली होती. नवसाचे बारागाडे, प्रदक्षिणा, विविध संस्था, संघटनांव्दारे पातळ अर्पण करण्यासाठी वाजतगाजत निघणारी मिरवणूक, चर्मकार बंधूंची चित्तथरारक जिव्हा त्रिशूलधारी मिरवणूक यंदा दिसल्या नाहीत. मंदिर भाविकांसाठी बंद असले तरी घरोघरी भल्या पहाटेपासून देवीला नैवद्य दाखविण्यासाठी गृहिणींची लगबग दिसून आली. मंदिरात प्रत्यक्ष दर्शनास न येता आपापल्या घरी देवीच्या प्रतिमेचे मनोभावे पूजन करून प्रामुख्याने कोरोनाच्या संकटातून मुक्त करण्याची प्रार्थना यंदा केल्या गेली. सायंकाळी ७ वाजता मंदिरात अत्यंत मोजक्या लोकांच्या उपस्थितीत देवीची महाआरती पार पडली. त्याचवेळी भाविकांनी आपापल्या घरी देवीच्या प्रतिमेसमोर पूजा, आरती करण्यासह अंगणात दिवे लावून दीपोत्सव साजरा केला. मंदिर परिसरातील अत्यंत तुरळक प्रमाणात भाविकांनी मंदिराबाहेरून देवीचे दर्शन घेतले.

वहन मिरवणुकीच्या परंपरेला दुसऱ्यांदा खंड!

यात्रोत्सवाचे मुख्य आकर्षण संध्याकाळी ६ वाजता व्याघ्रारूढ अशा भव्यदिव्य श्री रेणुकादेवीच्या पंचधातूच्या उत्सवमूर्तीची वहन मिरवणूक असते. वहन मिरवणुकीची ही परंपरा यंदादेखील खंडित झाली. सायंकाळी ६ च्या सुमारास देवीच्या मुखवट्याचे पूजन करून मंदिरात आतल्या आत प्रदक्षिणा करण्यात आल्यानंतर ७ वाजता महाआरती पार पडली. सुमारे २० तास चालणाऱ्या वहन मिरवणुकीतील पारंपरिक वाद्य, वाघ्या मुरळी, कलापथक, लेझीम, टिपऱ्या पथक व प्रचंड उत्साहालादेखील यंदा खंड पडला आहे.

अत्यंत लहान आकाराच्या वगदीव्दारे प्रदक्षिणा !

चैत्रपौर्णिमेला मंदिरास वगदी प्रदक्षिणा काढण्यात येते. या वगदीला लटकून अनेकजण नवसपूर्ती करतात. मात्र, यावर्षी वगदी प्रदक्षिणेवर बंधन घालण्यात आले आहे. यावर तोडगा काढत शेलूदवासीयांनी प्रतीकात्मक लहान वगदीची निर्मिती करून मानाची वगदी प्रदक्षिणा पूर्ण केली. शेलूदची ही मानाची वगदी खऱ्याखुऱ्या वगदीप्रमाणेच होती; परंतु अत्यंत लहान आकाराची असल्याने लक्षवेधी ठरली.