शेतमजुरावर रानडुकाराचा हल्ला

खेर्डा शिवारातील घटना : मजुर जखमी

जळगाव जामोद: तालुक्यातील खेर्डा खुर्द शिवारात शनिवारी दुपारी रानडुकराने शेतात पर्‍हाटी उपटत असलेल्या शेतमजुरावर हल्ला केला. यामध्ये शेतमजूर विश्‍वास दिनकरराव देशमुख (वय ४0) हे जखमी झाले. याबाबत वन विभाग जळगाव जामोद येथे तक्रार देण्यात आली असून, ग्रामीण रुग्णालयात शेतमजुरावर उपचार करण्यात आले. खेर्डा खुर्द शिवारात श्री संत गजानन महाराज पोलपोई परिसरात अमोल भीमराव देशमुख यांच्या गट नं.९२ या शेतात शनिवार २२ रोजी सकाळपासून विश्‍वास देशमुख हे पर्‍हाटी उपटण्याचे काम करीत होते. दुपारी १२ च्या दरम्यान, अचानक या शेतात रानडुक्कर आले व त्याने सरळ शेतमजूर विश्‍वास देशमुख यांच्या अंगावर धाव घेतली. त्यांनी रानडुकराला परतून लावण्याचा प्रयत्न केला; परंतु ते यशस्वी झाले नाही. रानडुकराने विश्‍वास देशमुख यांच्या डाव्या पायाच्या गुड्याजवळ मोठी जखम केली. आरडाओरडा झाल्याने इतर मजूर आल्यानंतर रानडुक्कर पसार झाले. विश्‍वासा देशमुख यांना ग्रामीण रुग्णालयात भरती केल्यानंतर दहा टाके देण्यात आले. जखम ही अत्यंत खोल असून, देशमुख यांच्या पायातून बराच रक्तस्राव झाल्याचे प्रत्यक्षदश्रींनी सांगितले. याबाबतची तक्रार वन विभागाकडे करण्यात आली. जंगलात पाणी नसल्याने हे जंगली प्राणी आता गावाकडे धाव घेत आहे. अमोल देशमुख यांचे शेत हे जळगाव ते वरवट रस्त्याच्या थोडे आत असून, येथे सतत वर्दळ असते. अशाही ठिकाणी रानडुक्कराने शिरकाव करणे हे शेतमजुरांसाठी अत्यंत घातक झाले आहे. सध्या उन्हाची दाहकता जास्त असल्याने पहाटे पाच वाजताच मजूर शेतीच्या कामावर जातात. या घटनेमुळे सर्व मजुरांमध्ये भीती निर्माण झाली आहे.