‘रेन वॉटर हार्वेस्टींग’ची अँलर्जी

जलपातळी सातत्याने खालावत असतानाही त्यावर मात करण्यासाठी रेन वॉटर हार्वेस्टींग योजना राबविण्याकडे शासकीय कार्यालयाचे दुर्लक्ष दिसून येत आहे.

खामगाव : शहरातील भूगर्भातील जलपातळी सातत्याने खालावत असतानाही त्यावर मात करण्यासाठी रेन वॉटर हार्वेस्टींग योजना राबविण्याकडे शासकीय कार्यालयाचे दुर्लक्ष दिसून येत आहे.

शहरातील मोठय़ा वास्तुमध्ये अथवा शासकीय कार्यालयात ही योजना अंमलात आणल्यास भविष्यातील पाणीटंचाईचे चटके कमी होण्यास मदत होईल. खामगाव शहराचा सध्या झपाट्याने विस्तार होत आहे. शहराची लोकसंख्या जसजशी वाढत आहे तसतसा नागरिकांच्या राहण्याचा प्रश्न निर्माण होत आहे. त्यामुळे शहरालगत अनेक ले-आऊट निर्माण झाले आहेत. प्रत्येक मार्गावर जणू ले-आऊटचे जाळे दिसून येते. मात्र यापैकी अनेक परिसरात पाणीच उपलब्ध नसल्याचे आढळून आले आहे. जमिनीत २00 फूट बोअर केल्यानंतरही पाणीच लागत नसल्याची परिस्थिती आहे. तेव्हा ज्या भागात राहण्याचे नियोजन असेल त्या ठिकाणी पाणीटंचाईवर मात करण्यासाठी रेन वॉटर हार्वेस्टींग प्रकल्प राबविणे गरजेचे आहे. पावसाळ्यात आलेले पावसाचे पाणी थेट वाहून जाते. पावसाचे पाणी असेच वाया जात असल्याने त्याचा कोणताही उपयोग होत नाही. हेच पाणी अडविण्यात आले तर त्याचा जनतेला लाभ होवू शकतो. पावसाचे पाणी जमिनीत मुरल्यास भूगर्भातील जलपातळीत वाढ होण्यास मदत होईल.

खामगाव हे उपविभागीय ठिकाण आहे. येथे उपविभागीय अधिकारी, उपविभागीय पोलिस अधिकारी, तहसीलदार, नगरपालिका, पंचायत समिती, भूमिअभिलेख, बांधकाम विभाग, पाटबंधारे विभाग, तालुका कृषी अधिकारी, उपविभागीय कृषी अधिकारी, निबंधक कार्यालय, नोंदणी कार्यालय, शासकीय गोदाम याशिवाय मोठी औद्योगिक प्रतिष्ठाणे, शाळा आणि महाविद्यालये, मंगल कार्यालये, संस्कृतीक भवनाच्या मोठय़ा वास्तू आहेत. किमान यासर्व वास्तुमध्ये रेन वॉटर हार्वेस्टींग प्रकल्प राबविणे गरजेचे आहे. मात्र यापैकी बहुतांश कार्यालयाच्या इमारतींमध्ये रेन वॉटर हार्वेस्टींग नसल्याची माहिती मिळाली आहे. शासकीय कार्यालयांना तर या प्रकल्पाची अँलर्जीच दिसून येते. भविष्यातील पाणीटंचाईवर मात करण्यासाठी शासन आणि प्रशासनाने पुढाकार घेवून जनतेत जागरुकता निर्माण करण्याची गरज आहे. प्रत्येकाला पाण्याचे महत्व पटवून देवून त्या दृष्टीने रेन वॉटर हार्वेस्टींग राबविण्याची आवश्यकता आहे.