लसीकरणासाठी भर उन्हात लागली रांग !

चिखली : कोरोनाचा प्रादुर्भाव वाढल्याने आता लसीकरणाचे महत्त्वदेखील नागरिकांना कळले आहे. त्यामुळे लस घेण्यासाठी नागरिकांची गर्दी होत आहे. मात्र, लसीकरणाच्या ठिकाणी योग्य नियोजन नसल्याने लस घेण्यासाठी आलेल्या नागरिकांना भर उन्हात उभे राहावे लागत होते. ही बाब निदर्शनास येताच चिखली अर्बन बँकेने पुढाकार घेत लसीकरण केंद्रावर मंडप उभारल्याने या मायेच्या सावलीमुळे प्रामुख्याने ज्येष्ठ नागरिकांना मोठा दिलासा मिळाला आहे.

कोरोनाचा प्रादुर्भाव मोठ्या प्रमाणावर वाढला आहे. यावर आळा घालण्यासाठी कोरोना प्रतिबंधक लस घेणे आवश्यक आहे. सुरुवातील या लसीकरणास अत्यल्प प्रतिसाद होता. मात्र, आता लसीचे महत्त्व कळल्याने, तसेच ४५ वर्षांवरील सर्व व्यक्तींच्या लसीकरणास सुरुवात झाली असल्याने लसीकरण केंद्रावर मोठ्या प्रमाणावर गर्दी वाढली आहे. पर्यायाने लसींचा तुटवडादेखील जाणवत आहे. मात्र, सद्य:स्थितीत लसींचा साठा उपलब्ध असल्याने शहरातील लसीकरण केंद्रावर येणाऱ्या नागरिकांची लांबपर्यंत रांग लागत आहे. भर दुपारी कडक उन्हात नागरिकांना लसीसाठी नंबर लावावा लागत असल्याने उष्माघात होण्याचा धोका वाढला होता. ही बाब निदर्शनास येताच दि चिखली अर्बन बँकेचे अध्यक्ष सतीष गुप्त यांनी तातडीने लसीकरण केंद्रावर मंडप टाकून सावलीची व्यवस्था केल्याने लसीकरण केंद्रावर येणाऱ्या नागरिकांना मोठा दिलासा मिळाला आहे. नागरिकांनी फिजिकल डिस्टन्सिंगचे पालन करावे, असे आवाहन सतीष गुप्त यांनी केले आहे.

लसीकरणाची व्याप्ती वाढविणे गरजेचे !

लसीकरणाच्या कामाला शहरात मोठा वेग आला आहे. त्यामुळे लसीकरण केंद्रावर मोठी गर्दी होते. या गर्दीमुळे कोरोनाबाबत पाळावयाच्या नियमांचा देखील फज्जा उडतो. त्यामुळे ही गर्दी टाळण्यासाठी योग्य नियोजन करण्यासह मुबलक प्रमाणात लसींचा साठा उपलब्ध करणे गरजेचे आहे.

मोहिमेच्या यशस्वीतेसाठी सहभाग आवश्यक !

यापूर्वी शहरातील काही प्रभागात स्थानिक नगरसेवकांच्या पुढाकाराने लसीकरणाची सुविधा उपलब्ध करून देत वार्डातील नागरिकांचे लसीकरण करण्यात आले आहे. आता चिखली अर्बननेदेखील लसीकरणाच्या या मोहिमेत कृतिशील सहभाग नोंदवून नागरिकांची हेळसांड होऊ नये याची काळजी घेतली आहे. याच धर्तीवर इतर संस्था व लोकप्रतिनिधींचा पुढाकार घेतल्यास लसीकरणाची मोहीम यशस्वी होण्यास फारसा वेळ लागणार नाही.