पौष पौर्णिमेच्या सूर्योदयसमयी जिजाऊंची महापूजा

पौष पौर्णिमेनिमित्त दरवर्षी जिजाऊ वंशजांच्या वतीने या जन्मोत्सव सोहळ्याचे आयोजन केले जाते. या वर्षी कोरोना संकट असल्याने अत्यंत साध्या पद्धतीने हा सोहळा पार पडला. २८ जानेवारी रोजी सूर्योदय समयी राजे लखुजीराव जाधवांचे वंशज, शिवसेना नेते छगनराव मेहेत्रे व स्थानिक नागरिकांच्या वतीने राजे लखुजीराव जाधव यांच्या राजवाड्यावर जिजाऊ जन्मस्थळी जिजाऊंच्या प्रतिमेचे पूजन करण्यात आले. यावेळी बालाजी संस्थाचे वंशपरंपरागत विश्वस्त विजय राजे जाधव, भागवत राजे, नगराध्यक्ष सतीश तायडे, माजी नगराध्यक्ष कमलताई मेहेत्रे, अनंतराव खेकाले यांची उपस्थिती होती. पौष पौर्णिमेनिमित्त संपूर्ण राजवाडा परिसर स्वच्छ करून सडा टाकून रांगोळी काढण्यात आली होती. तर जिजाऊ जन्मस्थळ हार फुलांनी संजविण्यात आले होते. सूर्योदय होताच मंत्रोचारात महापूजा झाली. महिलांनी जिजाऊ जन्माचे पाळणे गाऊन या उत्सवाला अधिक रंगत आणली.