विधिमंडळाची समिती घेणार विविध याेजनांची झाडाझडती

बुलडाणा : महाराष्ट्र विधानमंडळ अनुसूचित जाती कल्याण समिती २८ व २९ सप्टेंबर राेजी जिल्ह्याच्या दाैऱ्यावर येणार आहे़ ही समिती विविध शासकीय, निमशासकीय विभाग व कार्यालयांतील अनुसूचित जाती समितीच्या कल्याणकारी योजना आणि बिंदुनामावली आदींची झाडाझडती घेणार असल्याने प्रशासन तयारीला लागले आहे़ याविषयी जिल्हाधिकारी कार्यालयात झालेल्या बैठकीत नियाेजन करण्यात आले आहे़

आमदार प्रणिती शिंदे या समितीच्या प्रमुख आहे़ याशिवाय समितीत विधानसभा व परिषदेचे विविध पक्षीय आमदार बालाजी किणीकर, संतोष बांगर, यशवंत माने, किरण लहामटे, लहू कानडे, लखन मलिक, सुनील कांबळे, नामदेव ससाने, टेकचंद सावरकर, नरेंद्र भोंडेकर, अरुण लाड, राजेश राठोड, विजय गिरकर, बाळाराम पाटील, राजू आवळे यांचा समावेश आहे़ याशिवाय त्यांच्यासमवेत अधिकारी, कर्मचारी, स्वीय सहायक, प्रतिवेदक आदींचा ताफा राहणार आहे़ या १६ सदस्यांसाठी १६ संपर्क अधिकारी नेमण्यात आले आहेत. त्यामध्ये उच्च पदस्थ अधिकाऱ्यांचा समावेश आहे़ त्यांना समितीचे आगमन ते प्रस्थानापर्यंत समितीसमवेत राहण्याचे आदेश देण्यात आले आहेत. यात हलगर्जीपणा करणाऱ्या अधिकाऱ्यावर कोणत्याही पूर्वसूचनेशिवाय गंभीर कारवाई करण्याची तंबी देण्यात आली आहे़ विधिमंडळ समितीचा दौरा निश्चित होताच जिल्हाधिकारी एस़ रामामूर्ती यांनी तात्काळ सर्व विभागप्रमुखांची बैठक घेतली़ त्यात समितीच्या अनुषंगाने जय्यत पूर्वतयारी करण्याचे आदेश देण्यात आले.

कल्याणकारी याेजनांचा घेणार आढावा

विधिमंडळ समिती २८ सप्टेंबर राेजी सकाळी ९ ते ९.३० दरम्यान शासकीय विश्रामगृह येथे जिल्ह्यातील खासदार, आमदार, जि. प़ अध्यक्ष व सभापती यांच्या समवेत अनुसूचित जातीच्या कल्याणकारी योजनांचा आढावा घेणार आहे़ तसेच त्यामध्ये आढळून येणाऱ्या त्रुटींवर चर्चा करणार आहे़ यानंतर जिल्हाधिकारी कार्यालयात क्रमशः १३ पालिका व नगरपंचायत, जिल्हाधिकारी, जिल्हा अधीक्षक कृषी अधिकारी, वन, पाटबंधारे, अन्न नागरी पुरवठा, क्रीडा, सार्वजनिक बांधकाम, शिक्षणाधिकारी, उत्पादन शुल्क, एसटी महामंडळ, समाज कल्याण, विभागाच्या अधिकाऱ्यांशी चर्चा करणार आहे़

अधिकारी, कर्मचारी भरतीवरही हाेणार चर्चा

ही समिती एससी प्रवर्गातील अधिकारी, कर्मचारी यांची भरती, बढती, आरक्षण, अनुशेष व जात पडताळणी तथा कल्याणकारी योजनांवर ही चर्चा करणार आहे़ त्यानंतर दुपारी ३ ते सायंकाळी ६ वाजेदरम्यान शासकीय व अनुदानित शाळा, वसतिगृहे, जि.प.नगर परिषदांकडून करण्यात आलेल्या योजनांच्या कामांना व बुलडाणा पालिकेच्या दलित वस्ती योजनेच्या कामांची समिती पाहणी करणार आहे़

प्रशासन अलर्ट माेडवर

विधिमंडळ समितीचा दाैरा निश्चित हाेताच जिल्हा प्रशासन अलर्ट माेडवर आले आहे़ या समितीत अध्यक्षांपासून सदस्यांपर्यंत सर्व आमदार असल्याने प्रशासनाने दाैऱ्याची तयारी सुरू केली आहे़ सर्व विभागप्रमुखांची जिल्हाधिकाऱ्यांनी बैठक घेऊन नियाेजन करण्याचे आदेश दिले आहेत़