खामगाव नगरपालिकेचा कारभार रामभरोसे !

खामगाव नगरपालिकेचे अधिकारी दौर्‍यावर

गिरीश राऊत / अनिल गवई/ खामगाव
प्रशासकांची नियुक्ती झाल्यानंतर नगर पालिकेचा कारभार चांगलाच ढेपाळला आहे. नगर पालिकेतील अधिकारी दौर्‍यावर तर कर्मचारी वार्‍यावर असल्याचे चित्र नगर पालिकेच्या सर्वच विभागात आहे. अधिकारी कर्मचारी जागेवर नसल्याने नगर पालिकेतील विविध कामे प्रभावित झाल्याचेच लोकमतने आज दूपारी १२ ते २ वाजे पर्यंत केलेल्या स्टिंग ऑपरेशनमध्ये उघडकीस आले .
नगराध्यक्ष, उपाध्यक्षांचा कार्यकाळ संपुष्टात आल्यानंतर नगरपालिकेत प्रशासक नियुक्त करण्यात आले आहे. प्रशासकांची नियुक्ती झाल्यानंतर नगर पालिकेतील राजकीय हस्तक्षेप संपुष्टात आला आहे. त्याचप्रमाणेच प्रशासकांकडे अतिरिक्त प्रभार असल्याने त्यांना नगर पालिकेशी काही सोयर सूतक नसल्याचे दिसून येते. प्रशासक पदाची सुत्रे घेईपर्यंतच उपविभागीय अधिकारी नगर पालिकेत उपस्थित राहिले. मात्र, त्यानंतर प्रशासकाकडील कारभाराचा व्याप पाहता नगर पालिकेत येण्याची शक्यता नसल्याने आधीच सैरभैर झालेले नगर पालिका कर्मचारी चांगलेच मोकाट झाले. काही कर्मचारी तर चक्क कार्यालयीन वेळेतच गायब राहत असल्याचे चित्र आहे. मुख्याधिकार्‍यांसह अनेक विभागाचे प्रमुख आज बुधवारी बुलडाणा आणि अकोला येथे दौर्‍यावर होते. वरिष्ठ अधिकार्‍यांच्या अनुपस्थितीत आज नगर पालिकेतील कारभार चांगलाच ढेपाळला होता. वरिष्ठ नसल्यामुळे नगर पालिकेतील अनेक विभागातील कर्मचार्‍यांनी अघोषीत सुटीचा मनमुराद आनंद लुटला.