खामगाव कृउबास मतदार याद्या दाखल

लोकमतमधील वृत्तानंतर अधिका-यांना जाग आली; साहाय्यक निबंधकांकडे पोहचवल्या मतदार याद्या.

खामगाव (जि. बुलडाणा) : स्थानिक कृषिउत्पन्न बाजार समितीच्या मतदार यादीत घोळ अशा आशयाचे वृत्त ह्यलोकमतह्णमध्ये प्रकाशित होताच २१ जानेवारी रोजी गटसचिव संघटनेचे पदाधिकारी मानकर तसेच पंचायत समितीनेही आजच याद्या साहाय्यक निबंधक यांच्याकडे जमा केल्या आहेत. खामगाव कृषिउत्पन्न बाजार समिती संचालक मंडळाची निवडणूक प्रक्रिया जिल्हा उपनिबंधकांकडून ३0 ऑक्टोबर २0१४ रोजीच सुरु झाली. त्यानुसार कृषिउत्पन्न बाजार समिती, पंचायत समिती व गटसचिवांकडून मतदार याद्या मागविण्यात आल्या होत्या. तब्बल अडीच महिने उलटूनही कृषिउत्पन्न बाजार समिती वगळता पंचायत समिती व गटसचिवांकडून याद्या साहाय्यक निबंधकांकडे पाठविण्यात आल्या नव्हत्या. गटसचिव संघटनेचे पदाधिकारी मानकर यांनी आपण एक महिन्यापूर्वीच याद्या दिल्याची खोटी माहिती दिली. वास्तविक आज २१ जानेवारी रोजी सदर यादी दिल्याचे स्पष्ट झाले आहे. यासंदर्भात पत्र मिळाले नसल्याची प्रतिक्रिया देणारे पंचायत समिती अधिकारी व संबंधित लिपिक राठोड यांना सदर पत्राचे गांभीर्यच कळाले नसल्याची प्रतिक्रिया गटविकास अधिकारी पी. आर. वाघ यांनी देऊन जबाबदारी झटकली.