मृगाचा हत्ती, चित्राची म्हैस यंदा तारणार

मशागत अंतिम टप्प्यात; ८ जूनला लागणार मृग नक्षत्र; घरच्या बियाण्यावर शेतकर्‍यांचा भर.

बुलडाणा: पावसाचा अंदाज नेहमीच पंचागकर्ते ठरवितात. याच अंदाजावर शेतकरी विश्‍वास ठेऊन शेतात पेरणी करतात. खरीप हंगामात या नक्षत्रात असलेले वाहन शेतकर्‍यांच्या जीवनात सुख-दु:खाचे चक्रव्यूह सुरू ठेवतात. यंदा मृग नक्षत्र हत्ती या वाहनापासून तर चित्राच्या म्हैस या वाहनापर्यंत समाधानकारक पाऊस असल्याचा अंदाज पंचांगकर्त्यांनी व्यक्त केला असून, भरघोस उत्पन्नाची आशा पल्लवीत झाली आहे. दरम्यान, जिल्ह्यातील शेतजमिनीची मशागत अंतिम टप्प्यात आहे. मागील चार वर्षांत अनेकदा पावसाने खरीप हंगामात दगा दिला आहे. कोणत्या नक्षत्रात किती पाऊस पडणार, याविषयी पंचांगकर्त्यांनी आपले अंदाज मांडले. शेतकर्‍यांनी या अंदाजाप्रमाणे शेतीची मशागत करून पेरणी केली. या पूर्वीच्या हंगामात अनेक वेळा अतवृष्टीने तर कधी अल्प पावसामुळे शेतकर्‍यांच्या डोळ्यात पाणी आणले. मागील वर्षी जूनमध्ये समाधानकारक पाऊस झाला. तर घरात सोयाबीन पीक येत असताना झालेल्या अतवृष्टीमुळे सोयाबीनला झाडावरच कोंब फुटून सोयाबीनच्या उत्पादनात कमालीची घट झाली होती. यंदा खरीप हंगामात समाधानकारक पाऊस होणार असल्याचा अंदाज हवामान खात्याने व्यक्त केल्याने शेतकर्‍यांनी जमिनीची मशागत पूर्ण केली आहे. जिल्ह्यातील सोयाबीन व कापूस उत्पादक शेतकर्‍यांची मदार या खरीप हंगामाच्या उत्पादनावर असते. मृगाच्या पावसापासून हवामान खाते व पंचांगकर्त्यांचे अंदाज खरे ठरले तर यंदा अधिक उत्पादनाची शक्यता आहे.