कापसाचे भाव सहा हजार रुपयांवर

Cotton Price दोन दिवसांपूर्वी कापसाचे दर ६ हजार ५० रुपये क्विंटलपर्यंत वर चढले आहेत

लोकमत न्यूज नेटवर्क 
खामगाव : दोन दिवसांपूर्वी कापसाचे दर ६ हजार ५० रुपये क्विंटलपर्यंत वर चढले आहेत. पुरवठा आणि मागणी यामध्ये अशीच तफावत राहिल्यास कापसाचे दर आणखी प्रभावित होण्याची शक्यता आहे.
यावर्षी खामगाव तालुक्यातील घाटपुरी, वाडी, पळशी बु., पिंपळगाव राजा, आवार यासह अन्य गावांमध्ये परतीचा पाऊस जोरदार झाला. त्यामुळे बोंडसड झाल्याने कपाशीचे मोठ्या प्रमाणात नुकसान झाले. परतीचा पाऊस संततधार झाल्याने कपाशीची बोंडे सडली. परिणामी उत्पादनात २५ टक्के घट आली. या संकटातून शेतकरी सावरत नाही तोच कपाशीवर बोंडअळीचे आक्रमण झाले. बोंडसडनंतर बोंडअळीनेही कपाशीचे मोठे  नुकसान झाले. यामुळे पाहिजे तसे कापसाचे उत्पादन जिल्ह्यामध्ये झाले नाही. 

उत्पादनात घट 
यावर्षी बोंडसड व बोंडअळीमुळे कापसाच्या उत्पादनात घट झाली आहे. तसेच बोंडअळीवर नियंत्रण मिळविण्याकरिता कृषी विभागाने शेतकऱ्यांना फरदडीचा कापूस न घेण्याचे आवाहन केले होते. त्यामुळे फरदडीचा कापूस अनेक शेतकरी घेत नाही आहेत. परिणामी उत्पादनात घट आली आहे.  खासगी व्यापाऱ्यांकडे ही कापसाची आवक कमालीची मंदावली आहे. शेतकऱ्यांकडे कापूसच नसल्याने ही आवक मंदावल्याचे सांगितले जात आहे.