मंडळ अधिकारी व पोलिस कर्मचा-यास जिवे मारण्याचा प्रयत्न

अवैध गौण खनिज उत्खनन;तीन आरोपींविरुद्ध गुन्हा दाखल करण्यात आला.

बुलडाणा, दि. १0- अवैध गौण खनिज उत्खनन करुन वाहतूक करणार्‍या टोळीस अडविणार्‍या मंडळ अधिकारी व पोलीस कर्मचार्‍यांवर ट्रॅक्टर चालवून ठार मारण्याचा प्रयत्न केल्याची घटना गुरुवारी रात्री ८.३0 वाजता घडली. याप्रकरणी तीन आरोपींविरुद्ध गुन्हा दाखल करण्यात आला आहे. या घटनेमुळे परिसरात खळबळ उडाली आहे.
बुलडाणा तालुक्यातील कोलवड येथील लालमाती परिसरात अवैध मुरुम उत्खनन करुन वाहतूक होत असल्याबाबत मंडळ अधिकारी शैलेश गिरी यांना भ्रमणध्वनीवरुन माहिती मिळाल्यावरुन ते नायब तहसीलदार एस.एच.भांबळे हे गुरुवारी रात्री ८.३0 वा. घटनास्थळी पोहचले. तेथे त्यांना एक जेसीबी खोदकाम करीत असताना तसेच दोन ट्रॅक्टर मुरुम वाहतूक करीत असताना आढळून आले. मंडळ अधिकारी यांनी त्यांना गौण खनिज परवानगीबाबत विचारणा केली असता वाहतूक पास आढळून आली नाही. त्यामुळे त्यांनी जेसीबी मशीन व ट्रॅक्टर वाहने पोलीस ठाण्यात नेण्याबाबत सांगितले. मात्र ट्रॅक्टर चालकाने त्याचे ट्रॅक्टर (एमएच २८-टी ९२६६) मंडळ अधिकारी यांचे अंगावर घालून त्यांना ठार मारण्याचा प्रयत्न केला. प्रसंगावधान राखून लगेच बाजूला झाल्यामुळे मंडळ अधिकारी थोडक्यात बचावले. दरम्यान ट्रॅक्टरचालक ट्रकर घेऊन पळून जात असताना त्यांचा पाठलाग पोलीस नायक महादेव इंगळे यांनी केला असता ट्रॅक्टरचालकाने त्यांच्या अंगावर ट्रॅक्टर घातले. मात्र इंगळे हे सावध होऊन बाजूला झाल्याने त्यांचे प्राण वाचले.
घटनास्थळावरुन प्रमोद साहेबराव उबरहंडे, (१९ ), रा.भादोला वाडी व अमोल पुंजाजी उबरहंडे, रा.भादोलावाडी हे दोघे पळून जात असताना दोघांना ताब्यात घेतले. मंडळ अधिकार्‍याच्या अंगावर ट्रॅक्टर चालवून त्यांनी जीवे मारण्याचा प्रयत्न करणार्‍या सतिष चिंतामण जाधव, रा.कोलवड, ता.जि.बुलडाणा यालादेखील ताब्यात घेतले. तीनही आरोपींविरुद्ध बुलडाणा पोलिसांनी भादंवि कलम ३0७ व १८६, तथा महाराष्ट्र जमीन महसूल संहिता १९६६ चे कलम ४८ नुसार गुन्हा दाखल केला.