साकोली, लाखनी तालुक्यात होणार दोन हजार फळझाडांची लागवड

सबला लोकसंचालित साधन केंद्र साकोली व झेप लोकसंचालित साधन केंद्र, पालांदूर यांच्या कार्यक्षेत्रातील महिला बचत गटातील ३९० शेतकऱ्यांना प्रती शेतकरी ५ हजार रुपयांप्रमाणे रबी हंगामाकरिता खते वाटप करण्यात आली होती. याच कार्यक्षेत्रातील शेतकऱ्यांकरीता माविम व जीआयझेडच्या माध्यमातून फळझाडे लागवडीसाठी २ हजार आंबा, चिकू, पेरू, संत्रा या फळझाडांची लागवड करण्यात येत आहे. फळझाडे लागवडीसाठी तंत्रशुद्ध खड्डे खोदकामासाठी कृषी महाविद्यालयाचे माजी प्राचार्य डॉ. विजय पालवे यांच्या मार्गदर्शनातून साकोली तालुक्यातील एकोडी व लाखनी तालुक्यातील पाथरी येथे ऑनलाइन प्रशिक्षण घेण्यात आले. यावेळी जीआयझेडचे समन्वयक मयपथ नलावडे यांनी माविमच्या वतीने कोविड काळात १५ ते ३० जूनपर्यंत सर्व फळझाडांची लागवड होणार असल्याचे सांगितले. याप्रसंगी विविध जिल्ह्यातील उपजीविका समन्वयक, केंद्र व्यवस्थापक, झेप लोकसंचालित साधन केंद्र पालांदूरच्या अध्यक्ष शालिनी कोरे, व्यवस्थापक वंदना भिवगडे, लेखापाल धनंजय चौधरी, ऐकोडी येथील सरपंच भूमिता तिडके, सबला लोकसंचलित साधन केंद्र साकोली व्यवस्थापक कल्याणी गजभिये, लेखापाल सुनील कापगते यांच्यासह सहयोगिनी, बचत गटातील महिला व गावकरी उपस्थित होते. माविमच्या फळझाडे लागवड उपक्रमातून वृक्ष लागवड व वृक्ष संवर्धनासाठी नागरिकांनाही प्रेरित केले जाणार आहे.

कोट

माविम व जीआयझेडच्या माध्यमातून राज्यातील ९ जिल्ह्यात कोविड काळात शेतकऱ्यांना खते, बियाणे व औषधी महिला बचत गटांमार्फत दिले आहे. त्यासोबतच १ लाख फळझाडे लागवड केल्याने महिला बचत गटातील शेतकऱ्यांच्या उत्पन्नात नक्कीच भर पडेल.

केशव पवार,

प्रकल्प समन्वयक, माविम महाराष्ट्र राज्य

कोट

महिला बचत गटांना बँक कर्जाच्या माध्यमातून आर्थिक मदत करून व्यवसाय वृद्धीसाठी माविम सतत प्रयत्नरत आहे. माविमनिर्मित बचत गटांमध्ये मोठ्या प्रमाणात शेतकरी महिला असून त्यांना शेतीची माहिती व्हावी व योग्य त्या खते, बियाण्यांचा वापर व्हावा, यासाठी साकोली व लाखनी तालुक्यात हा प्रकल्प प्रथम राबविला जात आहे.

प्रदीप काठोळे,

जिल्हा समन्वय अधिकारी, माविम भंडारा