तुमसर पालिकेचे कार्य प्रशंसनीय

हागणदारीमुक्त अभियानाची राज्यस्तरीय पथकाकडून पाहणी दरम्यान शहरातील १० मुख्य ठिकाणाची तपासणी करण्यात आली.

सुधीर शंभरकर यांची माहिती : राज्यस्तरीय हागणदारीमुक्त पथकाची पाहणी 
तुमसर : हागणदारीमुक्त अभियानाची राज्यस्तरीय पथकाकडून पाहणी दरम्यान शहरातील १० मुख्य ठिकाणाची तपासणी करण्यात आली. सार्वजनिक शौचालयाची स्वच्छता, परिसरातील स्वच्छता व शहराचे सौंदर्यीकरण भुरळ पाडणारे आहे. विशेष म्हणजे प्रात:वेळी एकही इसम उघड्यावर शौच करताना आढळले नाही. एकंदरीत नगर पालिकेचे कार्य पथकाला प्रशंसनिय वाटले असून केंद्रीय समितीकडे शिफारस करण्यात येत आहे, अशी माहिती सुधीर शंभरकर उपसंचालक नगरप्रशासन नागपूर विभाग यांनी लोकमतला दिली.
यावेळी राज्यस्तरीय पथकातील नागपूर महानगर पालिकेचे अतिरिक्त आयुक्त रिजवान सिद्धीकी, शोभा राऊत, समाज सेविका दुर्गा भरळे उपस्थित होते.
सुधीर शंभरकर म्हणाले, यापुर्वी सन १९९३ मध्ये अशीच पाहणी करण्याकरिता तुमसर नगरपरिषदेमध्ये आले असताना त्यावेळी नाराज होऊन परतलो होतो. तुमसर माझ्याकरिता नवीन नव्हता. कुठे कुठे उघड्यावर शौच केल्या जाते हे माझ्या लक्षात होते. त्यामुळे आमच्या पथकाने आज २१ सप्टेंबरला पहाटे ५.१५ ला तुमसर गाठून शहराबाहेरील त्या रस्त्यावर आमचे पथक तैनात झाले होते. मात्र एकही इसम उघड्यावर शौच करताना दिसला नाही. त्यासाठी नगर परिषद कर्मचाऱ्यांचेही कौतूक करणे गरजेचे आहे.
त्याचबरोबर तुमसरचे नगराध्यक्ष अभिषेक कारेमोरे हे कर्तृत्ववान, क्रियाशिल नगराध्यक्ष असून त्यांना मुख्याधिकारी चंद्रशेखर गुल्हाने हे समविचारी मिळाल्याने झपाट्याने शहराचा विकास करून सौंदर्यीकरण शक्य झाले, असे कोणत्याही नगर परिषदमध्ये पाहायला मिळत नाही. दोन वर्षापुर्वीचा तुमसर व आताच्या तुमसरात बराच फरक पाहायला मिळाल्याने पथकाने त्यांच्या कार्याची स्तुती केली.
हागणदारी मुक्त अभियानअंतर्गत तुमसर नगर परिषदची निवड करून केंद्रीय समितीकडे नगर परिषदची शिफारसही करण्यात आली आहे. राज्यस्तरावर तुमसरचे नाव तर चकाकलेच आहे. ते आता केंद्रापर्यंत पोहचतील, अशीही अपेक्षा त्यांनी यावेळी बोलून दाखविली.
यावेळी नगराध्यक्ष अभिषेक कारेमोरे, मुख्याधिकारी चंद्रशेखर गुल्हाने उपाध्यक्षा सरोज भुरे, नगरसेवक सलाम तुरक, आशिष कुकडे, दिपक कठाणे, शालिनी पेठे, मनिष अग्रवाल, वहीद खान, किशोर साखरकर, मोहन बोरधरे, प्रविण बोरकर, सुमेद खापर्डे, सुनिल लांजेवार, जमिल शेख, गणेश मेहर, सुनिल चौधरी यांच्यासह पालकीचे पदाधिकारी व कर्मचारी आदी उपस्थित होते. (शहर प्रतिनिधी)