महिलेच्या विक्रीप्रकरणी तीन आरोपींना अटक

करडी व रोहा येथील दोन इसमांनी एका ३० वर्षीय, दोन मुलांची आई असलेल्या विधवा महिलेचा लग्नाचे आमिष दाखवून जळगाव...

करडी पोलिसांची कामगिरी : आणखी एका आरोपीच्या अटकेची शक्यता
करडी (पालोरा) : करडी व रोहा येथील दोन इसमांनी एका ३० वर्षीय, दोन मुलांची आई असलेल्या विधवा महिलेचा लग्नाचे आमिष दाखवून जळगाव येथील चार जणांसोबत ७० हजारांत विक्रीचा सौदा केला. सौद्यातील ५० हजारांची रक्कम देतो म्हणून आरोपींनी आळीपाळीने बलात्कार केल्याची तक्रार फिर्यादी महिलेने करडी पोलिसात दिल्या प्रकरणी शोध पथकाने माडगी व देव्हाडी येथून १९ सप्टेंबर रोजी राजू खंडरे रा.करडी व अशोक गायधने रा.रोहा तसेच सौद्यातील प्रकाश पाचोळे रा.आंबाडी (सिल्ली) यांना अटक केली. आणखी एका आरोपीला अटक होण्याची शक्यता आहे.
जिल्हा गोंदियातील देवरी तालुक्यातील चिचगड पोलीस स्टेशन अंतर्गत येत असलेल्या ककोडी येथील दोन मुलांची आई असलेल्या गरीब महिलेच्या पतीचा ५ वर्षापूर्वी मृत्यू झाला. गावातच एकाकी जीवन जगत असताना ती भंडारा तालुक्यातील कारधा येथील मावशीच्या गावी यायची. दरम्यान तिची ओळख सिल्ली येथील प्रकाश पाचोळे सोबत झाली. त्यांचे माध्यमातून करडी रोहा येथील राजू खंडरे व अशोक गायधने यांचेशी ओळख झाली. दहा ते पंधरा दिवसांपूर्वी ती मावशीच्या गावी कारधा येथे आली होती. त्या दरम्यान दोन्ही आरोपींनी तिला लग्नाचे आमिष दाखवून जळगाव येथील चार इसमांसोबत तिचा ७० हजारात विक्रीचा सौदा केला होता. लग्नाची गोष्ट पक्की झाल्याचे तिला सांगण्यात आले होते.
दोन्ही आरोपींनी तिला सौद्यातील ५० हजार रुपये देतो, म्हणून कारध्यावरून सायंकाळच्या सुमारास दुचाकीने करडी गावी आणले. तिला पाहून यांच्यातील सैतान जागा झाला. बहाणा करून त्यांनी तिला करडी वरून देव्हाडा ते साकोली मार्गाने मोहगाव ते निलज बुज. दरम्यान पांदन रस्त्याला नेवून रात्री ८.३० वाजताचे दरम्यान तिच्यावर आळीपाळीने बलात्कार केला. प्रकरणी करडी पोलिसात सदर महिलेने दि. १७ सप्टेंबर रोजी तक्रार केली. कलम ३७६ (२), (ड) भादंवी अंतर्गत गुन्हा दाखल करण्यात अला. गुन्हा दाखल झाल्याची कुणकुण लागताच आरोपी गावातून पसार झाले होते. उपविभागीय पोलीस अधिकारी जोगदंड व करडीचे ठाणेदार प्रभाकर बोरकुटे यांचे मार्गदर्शनाखाली सहाय्यक ठाणेदार कटरे, पोलीस हवालदार गौतम, सोलंकी यांचे शोध पथक तयार करण्यात आले. अखेर शोख पथकाने माडगी व देव्हाडी येथून तिन्ही आरोपींनी रात्री ८.३० वाजताचे दरम्यान अटक केली. आरोपींचे बयाण घेण्यात आले असून मोहाडी न्यायालयात हजर करण्यात आले आहे. (वार्ताहर)