नववर्षाच्या स्वागतासाठी तरूणाई सज्ज, ‘काऊंट डाऊन’ सुरू

नव वर्षाच्या स्वागतासाठी आता पासूनच तरूणाईत काऊंटडाऊन सुरू झाले असून अनेकांनी तर नववर्षाच्या स्वागताचे ‘प्लॅनिंग’ सुरू केले आहे.

तुमसर : नव वर्षाच्या स्वागतासाठी आता पासूनच तरूणाईत काऊंटडाऊन सुरू झाले असून अनेकांनी तर नववर्षाच्या स्वागताचे ‘प्लॅनिंग’ सुरू केले आहे. नववर्षांचे स्वागत पर्यटनस्थळीच करण्याकडे तरूणाईचा विशेष कल आहे. शहरातील हॉटेल, उपहारगृह चालक व अन्य पुरक व्यवसायकांनीही थर्टी फस्टची जोदार तयारी सुरू केली आहे. दरम्यान गतवर्षीप्रमाणे यंदाही हुल्लडबाजी करण्याऱ्यांवर पोलिसांची करडी नजर आहे.
थर्टीफस्ट नववर्षाच्या सुरवातीला अद्यापही सहा दिवसांचा कालावधी असला तरी तरूणाईने आतापासूनच सर्व प्लॅनिंग सुरू केले आहे. सोशल मिडियात डोकावून बघितल्यास शुभेच्छांचा वर्षाव कोण काय काय करणार, कसे करणार हे आधीच ठरवून घेतल्या असल्याचे बघावयास मिळत आहे. त्याचबरोबर शहरातील हॉटेल, रेस्टारंट, बार आदी व्यवसायीकही नववर्षाला नवीन रंगढंग देण्याचा प्रयत्न चालविला आहे.
दि.३१ डिसेंबरला संध्याकाळी पाच वाजल्यापासून जल्लोषाला सुरूवात होतो. दुचाकी, चारचाकी गाडीतून तरूणाई शहरात तसेच शहराबाहेरील पर्यटनस्थळी चांदपूर, माडगी, बावनथडी प्रकल्प येथे जथ्या जथ्याने जाताना दिसतात. त्या जंगलातीलच लाकुडफाटे गोळा करून बोचऱ्या थंडीत नववर्षाचे स्वागत करण्यात येणार आहे. नववर्षाच्या पुर्वसंध्येला दारू विक्री जोमार राहणार असल्याने पोलिसांची पथकेही सज्ज झाली आहेत.
नववर्षाच्या स्वागतला गालबोट लागू नये यासाठी सामान्य परिवारातील लोक नको ती पार्टी असेही दबक्या आवाजात बोलत आहे. त्यामुळे अशा घटनांना पायबंद घालण्याची गरज लक्षात घेवून तुमसर पोलिसांनी अशा हुल्लडबाजावर करडी नजर ठेवली आहे.
‘थर्टी फस्ट म्हटले की दंगा, हुल्लडबाजी असेच काहीसे समीकरण होवून बसले आहे. नववर्षाचे स्वागत करण्याच्या नावाखाली निव्वड दारूची अवैधविक्री होत असून हॉटेल बियर बार, वाईन्स शॉप चालकाची चांगलीच चलती सुरू राहणार आहे. या काळात लाखों रूपयांची उलाढाल होण्याची शक्यता नाकारता येत नाही.
दुसरीकडे नववर्षाच्या पर्वावर बाजारपेठेत ३१ डिसेंबरला पाय ठेवायलाही जागा राहत नाही. त्यामुळे अनेक जण निर्जन ठिकाणी जाणे पसंद करतात.
मात्र निर्जन स्थळीही असामाजिक तत्वांचा वावार असल्याने पोलिसांनी तशा सुचना दिल्या आहेत. दरम्यान बोचऱ्या थंडीतही तरूणाईचा उत्साह कायम आहे. (शहर प्रतिनिधी)

शहर व परिसरातील पर्यटनस्थळावर नव वर्ष साजरे करणारे तसेच शहरातही अती संवेदनशील ठिकाणी पोलिसांची तैनाती राहणार आहे. कोणतीही अनुचित घटना घडू नये याची काळजी घेतली जाईल.
-किशोर गवई, पोलीस निरीक्षक, तुमसर.