कर्तव्यात कसूर केल्यास निलंबन

प्रलंबित मागण्यांविषयी चर्चा करून मागण्या निकाली काढण्यात येईल,...

चरण वाघमारे यांचा इशारा : महिन्याभरात समस्या निकाली काढणार, सहविचार सभा
भंडारा : प्रलंबित मागण्यांविषयी चर्चा करून मागण्या निकाली काढण्यात येईल, तसे पत्र महिन्याभरात कोणत्याही परिस्थितीत निर्गमीत करण्यात येईल.कर्तव्यात कसूर आणि जाणीवपूर्वक हेतू साध्य करण्याकरिता प्रकरणे अडवून धरली जात आहेत असे लक्षात येताच निलंबनासाठीची कारवाई आणि शिफारस केली जाईल, असा इशारा आमदार चरण वाघमारे यांनी अधिकाऱ्यांना दिला.
जिल्ह्यातील खासगी व जिल्हा परिषद प्राथमिक, माध्यमिक मधील शिक्षकांच्या समस्या निकाली काढण्याकरिता आमदार चरण वाघमारे, शिक्षणाधिकारी प्राथमिक, माध्यामिक व परिषदेचे पदाधिकारी यांच्या संयुक्त सहविचार सभेचे आयोजन विश्रामगृह येथे करण्यात आले होते. त्याप्रसंगी ते बोलत होते.
सभेला शिक्षणाधिकारी स्वर्णलता घोडेस्वार, माध्यमिक शिक्षण विभागाचे आईलवार, भोंगाडे व शिक्षक परिषदेचे डॉ.उल्हास फडके, कार्यवाह अंगेश बेहलपाडे आदी उपस्थित होते.
सहविचार सभेत जिल्हा परिषद शिक्षकांचे १ तारखेला वेतन देणे, वरिष्ठ व निवड श्रेणीची प्रलंबित प्रकरणे निकाली काढणे, जि.प. शाळांमधील, पर्यवेक्षक, उपमुख्याध्यापक, मुख्याध्यापक ही रिक्त पदे तात्काळ भरून काढावे, पात्र माध्यमिक शिक्षकांमधून कनिष्ठ महाविद्यालय रिक्त पदे भरणे, डीसीपीएस च्या रकमेचा हिशोब देणे व खात्यावर जमा करणे, २००६ पासूनचा प्रलंबित बदली प्रवास भत्ता मंजूर करणे, चुकीच्या पद्धतीने तयार झालेल्या सेवाज्येष्ठता यादीला दुरुस्त करणे, तक्रारी प्राप्त झालेल्या जि.प. प्राथमिक, माध्यमिक विभागात काम करणाऱ्या कर्मचाऱ्यांना कारणे दाखवा नोटीस बजावून कठोर दंडात्मक कार्यवाही प्रस्तावित करणे, एक महिन्यापेक्षा अधिक कालावधी कोणत्याही प्रकरणात न लागू देणे, कार्यालयात येणाऱ्या शिक्षक व मुख्याध्यापक यांना सन्मानजनक वागणूक देणे, तक्रारींचा निपटारा कोणत्याही परिस्थितीत एक महिन्याच्या आतच करणे, समायोजनाचा घोळ दुरुस्त करणे, सेवानिवृत्ती प्रकरणे निकाली काढणे, वैद्यकीय प्रकरणे अडवून धरणाऱ्या कर्मचाऱ्यावर शिस्तभंगाची कारवाई करणे, खासगी शाळेतील बदली प्रस्तावांना तात्काळ मान्यता प्रदान करणे इत्यादी प्रकरणावर चर्चा करण्यात आली.
यावेळी शिक्षक परिषदेचे डॉ.उल्हास फडके, कार्यवाह अंगेश बेहलपाडे, पी.पी. डोमळे, प्रदीप गायकवाड, हरिहर पडोळे, प्रा.सशांक चोपकर, यादव गायकवाड, हरिहर पडोळे, दिलीप वाणी, महादेव तेलमासरे, माधव रामेकर, राधेशाम धोटे, राजेश निंबार्ते सहभागी झाले होते. (नगर प्रतिनिधी)