दुर्मिळ मूत्राशयातील कर्करोगाच्या गाठीवर यशस्वी शस्त्रक्रिया

येथील सुभाषचंद्र बोस उपजिल्हा रुग्णालयात सेवा देणारे डॉ. सौरभ कुंभारे हे रुग्णालयातील ओपीडीमध्ये रुग्णांची तपासणी करत असताना मध्य प्रदेशातून विजय दरेकर (१८) रा. बोनकट्टा ता. कटंगी, जि. बालाघाट येथील रुग्ण हा तपासणीसाठी आला असता त्याच्या मूत्राशयाच्या पिशवीत गाठ असल्याचे निदर्शनास आले. त्याला विविध चाचण्या करण्यास सांगितले. चाचणीअंती त्या युवकाच्या मूत्राशयाच्या पिशवीत गाठ असल्याचे निष्पन्न झाले. मात्र उपजिल्हा रुग्णालयात शस्त्रक्रियेसाठी आवश्यक साधनसामुग्री नसल्याने डॉ. कुंभारे यांनी त्यांच्या खाजगी रुग्णालयात अतिशय कमी खर्चात त्या युवकावर दुर्बिणद्वारे जटिल व यशस्वी शस्त्रक्रिया करून कर्करोगापासून रोगमुक्त करून त्या युवकाला नवसंजीवन मिळवून दिले. तुमसरसारख्या छोट्या शहरात आता एवढ्या जटील व कॅन्सरसारख्या गाठीच्या शस्त्रक्रिया करून तुमसरचे नाव डॉ. कुंभारे यांनी चमकवले आहे.

कोट

सदर आजार साधारणपणे ४० वर्षावरील इसमांना होतो. क्वचितच किशोरवयीन मुलांना हा आजार जडतो. यामध्ये वारंवार लघवी होणे, लघवीतून रक्त जाणे, कोथा दुखणे अशी लक्षणे दिसताच ताबडतोब डॉक्टरांचा सल्ला घेऊन योग्य उपचार घेतल्यास रुग्णाचे प्राण वाचवता येऊ शकतात.

डॉ. सौरभ कुंभारे, तुमसर.