सावित्रीबाई फुले दत्तक पालक योजनेत गौडबंगाल!

सावित्रीबाई फुले दत्तक पालक योजना यशस्वीरित्या राबविण्याकरीता शिक्षकांनी शिक्षण विभागाला प्रति शिक्षक १०० रुपये दिले. सुमारे ६०० शिक्षकांचे ६० हजार रुपये जमा झाले होते.

 तुमसर : सावित्रीबाई फुले दत्तक पालक योजना यशस्वीरित्या राबविण्याकरीता शिक्षकांनी शिक्षण विभागाला प्रति शिक्षक १०० रुपये दिले. सुमारे ६०० शिक्षकांचे ६० हजार रुपये जमा झाले होते. परंतु तुमसर येथील गटशिक्षणाधिकारी व्ही.आर. आदमने यांनी शिक्षण विभागात शैक्षणिक सत्र २०१३-२०१४ मध्ये केवळ ३७ हजार ५०० रुपये जमा केल्याची खळबळजनक माहिती आहे. उर्वरित रक्कम गेली कुठे? असा प्रश्न येथे उपस्थित होत आहे. भंडारा जिल्हा परिषद जिल्ह्यातील इयत्ता १ ते ८ करीता सावित्रीबाई फुले दत्तक पालक योजना दरवर्षी राबविते. यात १ ते ८ चे शिक्षक आर्थिक सहकार्य करतात. तुमसर तालुक्यात या योजनेकरीता प्रति शिक्षकांकडून १०० रुपये घेण्यात आले होते. शैक्षणिक सत्र २०१३-१४ मध्ये सुमारे ६०० शिक्षकांकडून ६० हजार रुपये जमा करण्यात आले होते अशी माहिती आहे. पंचायत समिती अंतर्गत ही रक्कम जिल्हा परिषदेकडे जमा करावी लागते. या योजनेत प्रत्येक शाळेतील इयत्ता पहिलीमधील सर्वात गरीब विद्यार्थिनीला ५०० रुपये एका वर्षात एकदच दिले जातात. तुमसर तालुक्यात १ ते ७ च्या ६१ तर १ ते ४ च्या ७७ शाळा अशा एकूण १३८ शाळा आहेत. तुमसर पंचायत समितीच्या गटशिक्षणाधिकारी कार्यालयाकडून शैक्षणिक सत्र २०१३-२०१४ मध्ये जिल्हा परिषद भंडाराकडे ३७ हजार ५०० रुपये जमा केले आहेत. उर्वरित सुमारे २२ हजार ५०० रुपये कुठे गेले हा संशोधनाचा विषय आहे. (तालुका प्रतिनिधी)