पक्षीय-सर्वपक्षीय राजकारणाने नेत्यांची दमछाक!

जिल्हा परिषद व पंचायत समिती आणि भंडारा अर्बन बँक निवडणुकीचे मागेपुढे बिगुल वाजले.

निवडणूक जिल्हा परिषद व अर्बन बँकेची : सहकारातील सर्वपक्षीय उमेदवारांना एकाच वाहनात बघून कार्यकर्ते अचंबित
भंडारा : जिल्हा परिषद व पंचायत समिती आणि भंडारा अर्बन बँक निवडणुकीचे मागेपुढे बिगुल वाजले. आता या दोन्ही निवडणुका एका दिवसाच्या फरकाने होत आहेत. त्यामुळे जिल्हा परिषदेतील पक्षीय राजकारण तर सहकारातील सर्वपक्षीय राजकारणामुळे प्रचारात फिरताना नेत्यांची दमछाक होणार आहे.
जिल्हा परिषद व पंचायत समिती काबीज करण्यासाठी काँग्रेस, राष्ट्रवादी काँग्रेस, भाजप आणि शिवसनेना हे प्रमुख राजकीय पक्ष रिंगणात उतरले आहेत. समर्थकांना उमेदवारी मिळावी, यासाठी गटातटावर मात करताना काहींना यश आले तर काहींना अपयश आले. त्यामुळे काही बंडखोरी करण्याचा प्रयत्नात आहेत. इतकी कसरत जिल्हा परिषदेच्या निवडणुकीत पदाधिकाऱ्यांना करावी लागली आहे. उमेदवारी वाटपाची कसरत कुण्या एका पक्षातच झाली असे नाही, सर्वच पक्षात गटातटाचे राजकारण झाले. ४ जुलै रोजी होणाऱ्या निवडणुकीचा निकाल ६ रोजी स्पष्ट होईलच.
परंतु, त्यापाठोपाठ भंडारा अर्बन बँकेची निवडणूक ५ जुलै रोजी होऊ घातली आहे. या निवडणुकीत गणपतराव बांगडकर, अ‍ॅड.नारायणराव तलमले यांच्या नेतृत्वात जनहीत पॅनेल, नाना पंचबुद्धे यांच्या नेतृत्वात गुर्जर पॅनेल तर जयंत वैरागडे यांच्या नेतृत्वात सहकार पॅनेल निवडणूक लढत आहेत. आतापर्यंत सत्तेत असलेल्या गुर्जर व सहकार पॅनेलच्या विरुद्ध जनहीत पॅनेलने बंड थोपटले आहे.
जनहित पॅनेल वगळता अन्य दोन्ही पॅनेलमध्ये ‘एकमेका सहाय्य करु’ या भावनेतून सर्वपक्षीय उमेदवार सहकाराचे राजकारण करीत रिंगणात आहेत. अर्बन बँकेचे मतदार जिल्हाभरात विखुरले असून त्यांची मतदारसंख्या ५० हजाराच्यावर आहे. अर्बनच्या निवडणुकीत पॅनेलचा प्रचार करताना हे सर्वपक्षीय उमेदवार एकाच वाहनात बसून मिळून प्रचार करीत आहेत. दुसरीकडे जिल्हा परिषदेची निवडणूक असल्यामुळे या उमेदवारांना एकाच वाहनात पाहून गावातील कार्यकर्ते अचंबित होत आहेत. गावात पोहोचल्यानंतर अर्बनचे उमेदवार एकाच वाहनातून उतरताना कार्यकर्त्यांना हे कुणाच्या प्रचारासाठी आले, असा संभ्रम निर्माण होत आहे.
काही पक्षातून एकच उमेदवार बँकेत आणि जिल्हा परिषदेतही निवडणूक लढत आहेत. आता अर्बनच्या निवडणुकीत जे विरोधात आहेत. ते जिल्हा परिषदेच्या निवडणुकीत त्यांच्या प्रचाराला जातील कां? असा प्रश्न कार्यकर्त्यांना पडला आहे. बँकेच्या निवडणुकीत विरोध आणि जिल्हा परिषदेच्या निवडणुकीत समर्थन असे चित्र जिल्ह्यातील मतदारांना पहिल्यांदा अनुभवला मिळणार आहे.
ग्रामपंचायत निवडणूकही तोंडावर
ग्रामपंचायत निवडणूक ही राजकारणाची पहिली पायरी आहे. ही निवडणूक पक्षाच्या चिन्हांवर लढत नसली तरी गावागावांत राजकीय पदाधिकाऱ्यांचीच पॅनेल निवडणूक लढत असते. जिल्हा परिषद आणि अर्बन बँकेचे मतदारही गावागावांत आहेत. ग्रामपंचायत निवडणुकाही तोंडावर आल्यामुळे गावातील राजकारण सांभाळताना नेत्यांना जनतेच्या प्रश्नांना सामोरे जावे लागणार आहे. असाच प्रकार साकोली, लाखनी, लाखांदूर व मोहाडी येथील नगरपंचायतीच्या निवडणुकीतही पदाधिकाऱ्यांना पहावयास मिळणार आहे. (जिल्हा प्रतिनिधी)