सातलवाडा येथे विजेच्या धक्क्याने लाईनमनचा मृत्यू

नितीन माधोराव कांबळे (३२) रा.साकोली असे मृताचे नाव आहे. ते वीज वितरण कंपनीच्या सेंदुरवाफा कार्यालयात कार्यरत होते. शनिवारी त्यांच्या क्षेत्रांतर्गत येत असलेल्या सातलवाडा गावात वीज प्रवाहात काही तांत्रिक अडचण आली. आपल्या सहकाऱ्यांसोबत ते दुरुस्तीच्या कामासाठी गेले होते. दुरुस्तीसाठी वीज खांबावर चढले. काम करीत असताना अचानक वीज प्रवाहित तारेला स्पर्श झाला आणि ते खाली कोसळले. सोबतच्या सहकाऱ्यांनी तत्काळ साकोली येथील उपजिल्हा रुग्णालयात उपचारासाठी दाखल केले. मात्र तपासणी करताच डाॅक्टरांनी मृत घोषित केले. साकोली पोलीस ठाण्यात या घटनेची माहिती देण्यात आली. या घटनेने परिसरात हळहळ व्यक्त होत आहे.

वीज कशी सुरू झाली?

नितीन कांबळे खांबावर कामासाठी चढले त्यापूर्वी वीज प्रवाह बंद करण्यात आला होता. मात्र काम पूर्ण होण्याआधीच वीजपुरवठा कसा काय सुरू झाला हा प्रश्न आहे. याप्रकरणाची सखोल चौकशी झाल्यास खरा प्रकार पुढे येऊ शकतो.