जयश्री व ज्योतीला मिळाला मायेचा आधार

आई-वडिलांचे छत्र हरपल्यानंतर उदंड आयुष्य साथ कोण देणार, असा यक्ष प्रश्न उभा असताना ऊमद्या तरूणांनी धीर देत

उमद्या तरूणांचाही पुढाकार : सरपंच, तंमुसही सरसावले
इंद्रपाल कटकवार   भंडारा
आई-वडिलांचे छत्र हरपल्यानंतर उदंड आयुष्य साथ कोण देणार, असा यक्ष प्रश्न उभा असताना ऊमद्या तरूणांनी धीर देत 'त्या' अनाथ मुलींच्या जीवनात चैतन्य फुलविण्याचा विडा उचलला आहे. परिणामी जयश्री व ज्योतीला मायेचा आधार मिळाला आहे. याला सरपंच व तंटामुक्त समितीसह ग्रामस्थांनीही हातभार लावला आहे.
भंडारा तालुक्यातील पिंडकेपार (टोला) येथे शंकर दलपत चांदेकर या मृत पावलेल्या इसमाच्या कुटूंबियात आता फक्त त्याची दोन मुली जीवनाच्या संघर्षात एकट्या आहेत. मंगळवार (१० जानेवारी) दिवशी जयश्री व ज्योतीची आई हृदयविकाराने मरण पावली. बाबा नसताना भगवंताने आईचाही आधार हिरावून घेतला. या अनाथ मुलींचा आधारवड हिरावल्याने त्यांचा सांभाळ करणारे देवदूत त्यांना मिळतील काय, या आशयाचे वृत्त लोकमतने गुरूवारी (१२ जानेवारी) प्रकाशित केले. मानवी संवेदना हरविली असताना दोन ऊमद्या तरूणांनी या दोन्ही बालिकांच्या जीवनात पुन्हा एकदा आशावाद निर्माण केला. जयश्री (१३) व ज्योती (८) या दोघींना आगामी शैक्षणिक सत्रात वसतीगृहात दाखल करण्याचा निर्णय घेतला. भविष्यात होणाऱ्या संपूर्ण शिक्षणाचा खर्च हे दोघे उमदे तरूण उचलणार आहेत. भाजपचे नगरसेवक आशिष गोंडाने तथा भाजपचे व्यापारी आघाडी सेलचे अध्यक्ष नितीन दुरगकर अशी या तरूणांची नावे आहेत.

मदतीचा हात
पिंडकेपार सरपंच प्रशांत रामटेके, तंटामुक्त गाव समितीचे अध्यक्ष बबलू आतिलकर यांनी चांदेकर यांच्या घरी भेट देवून आर्थिक मदत दिली. यावेळी उपस्थित पंचायत समिती सदस्य वर्षा साकुरे यांनीही या मुलींना मदत करण्याचे आश्वासन दिले. यावेळी उपसरपंच सुषमा मडामे, ग्रामपंचायत सदस्य संजय साठवणे, वनमाला दिवटे, पोलीस पाटील साठवणेश्रीकांत मेश्राम, प्रल्हाद मेश्राम, सुरेश मेश्राम आदी उपस्थित होते.