जयंत पाटील यांनी वाहनाचे केले स्वत: सारथ्य

भंडारा : राष्ट्रवादी परिवार संवाद दौऱ्यात दिवसभर सभा, बैठकांसोबत जनतेशी संवाद असा दिनक्रम. सोबतच्या युवा पदाधिकाऱ्यांशी संवाद साधता यावा, म्हणून राष्ट्रवादीचे प्रदेशाध्यक्ष जयंत पाटील यांनी वाहनाचे स्वत: सारथ्य केले. नागपूर जिल्ह्यातील भिवापूरपासून ६० किलोमीटरचा प्रवास करीत भंडारा गाठले. या दोन तासांत त्यांनी पदाधिकाऱ्यांशी संवाद साधत त्यांना मार्गदर्शन केले.

राष्ट्रवादी काँग्रेसच्या वतीने राज्यभर परिवार संवाद दौऱ्याचे आयोजन करण्यात आले. राज्याचे जलसंपदामंत्री आणि राष्ट्रवादीचे प्रदेशाध्यक्ष यांच्या नेतृत्वात ही परिसंवाद यात्रा सध्या पूर्व विदर्भात आहे. या दौऱ्यात दिवसभर पक्षाचा आढावा, सभा आणि पदाधिकाऱ्यांसोबत जनतेच्या भेटीगाठी असा दिनक्रम असतो. शुक्रवारी चंद्रपूर जिल्ह्यातील चिमूर येथे सभा आटोपून जयंत पाटील भिवापूर येथे पोहोचले. तेथून त्यांना भंडाऱ्याकडे निघायला मध्यरात्र उलटली होती. दुसऱ्या दिवशी भंडाऱ्यात विविध कार्यक्रमांचे आयोजन होते. मध्यरात्री १ वाजताच्या सुमारास ते भिवापूरवरून भंडाऱ्याकडे निघाले. मात्र, यावेळी त्यांनी स्वत: स्टेअरिंगचा ताबा घेतला. तब्बल दोन तास वाहन चालवित पहाटे भंडाऱ्यात पोहोचले.

या दोन तासांच्या प्रवासात त्यांच्यासोबत राष्ट्रवादीच्या महिला प्रदेशाध्यक्ष रूपाली चाकणकर, युवक प्रदेशाध्यक्ष महेबूब शेख, कार्याध्यक्ष रविकांत वरपे, युवती प्रदेशाध्यक्ष सक्षणा सलगर, विद्यार्थी प्रदेशाध्यक्ष सुनील गव्हाणे होते. यावेळी त्यांनी विविध विषयांवर युवा पदाधिकाऱ्यांशी संवाद साधला. भंडाऱ्यात पहाटे पोहोचल्यानंतर सकाळी ६ वाजता ते नियोजित कार्यक्रमाच्या तयारीला लागले आणि ९ वाजता जिल्हाधिकारी कार्यालयात आयोजित जलसंपदा विभागाची आढावा बैठकही घेतली. त्यांनी स्वत: वाहनाचे सारथ्य करून युवा पदाधिकाऱ्यांशी संवाद साधल्याने, युवा टीम चांगलीच प्रभावित झाली.