जिल्ह्यात मृगधारा बरसल्या, दमदार पावसाची प्रतीक्षा

मंगळवारी सकाळी ६ वाजून ४० मिनिटांनी सूर्याने मृग नक्षत्रात प्रवेश केला असून या नक्षत्राचे वाहन गाढव आहे. या नक्षत्रात पावसाची स्थिती कशी राहील यावर पेरणी अवलंबून आहे.

सरासरी हवामान अंदाजानुसार १५ जूनपर्यंत विदर्भात मान्सून दाखल होण्याचा अंदाज असतो. १ जूनला कोकण नंतर ७ जूनपर्यंत मुंबई व हप्ताभरानंतर विदर्भात दाखल होतो. महाराष्ट्रात मान्सून अर्थात नैऋत्य मोसमी वाऱ्याने हजेरी लावलेली आहे. त्यामुळे पेरणीकडे कल वाढत असला तरी अर्धे मृग नक्षत्र होईपर्यंत भंडारा जिल्ह्यात पेरणीला गती येत नाही. पाण्याची स्वतंत्र व्यवस्था असणाऱ्या शेतकऱ्यांनी पेरणीला आरंभ केलेला आहे. कोरडवाहू शेतकरी दमदार पावसाच्या प्रतीक्षेत आहे. धूळ पेरणी धोक्याची होत असल्याने शेतकरी सावधगिरी बाळगत आहे.

बॉक्स

पेरणीची घाई करू नका!

पुरेसा पाऊस झाल्याशिवाय शेतकऱ्यांनी पेरणी करू नये असे आवहन कृषी विभागाच्यावतीने करण्यात आले आहे. ८० ते १०० मिमी पाऊस होत नाही तोपर्यंत पेरणीची घाई करू नये. पेरणीला घाई करण्यापेक्षा रोवणीसाठी कमी दिवसाचे रोप लावावे. मध्यम कालावधीच्या बियाण्याची निवड करावी, असे आवाहन तालुका कृषी अधिकारी पद्माकर गीदमारे व मंडळ कृषी अधिकारी गणपती पांडेगावकर यांनी केले आहे.

जिल्ह्यात पावसाची हजेरी

मृग नक्षत्राच्या पहिल्या दिवशी जिल्ह्यात पावसाने हजेरी लावली. भंडारा शहरात सायंकाळी पावसाची सर कोसळली. दुपारी ३ वाजताच्या सुमारास वादळी वातावरण तयार झाले होते. वादळाने रस्त्यावर दुकान लावून बसणाऱ्यांचे साहित्य उडून केले. तुमसर तालुक्यातील पवनारा परिसरात मंगळवारी दुपारी २.३० वाजता जोरदार पाऊस झाला. पवनी तालुक्यात आसगावसह चौरास भागात ४५ मिनिटे चांगला पाऊस बरसला. लाखांदूर तालुक्यातही पावसाने हजेरी लावली असून मोहाडी तालुक्यात विजांच्या कडकडाटात पाऊस झाला. लाखनी तालुक्याच्या पालांदूर परिसरात मृगाच्या हलक्या सरी बरसल्या. या पावसाने नागरिकांची उकाड्यापासून सुटका केली.