प्रवास भाडे सवलतीसाठी आता ‘आधार’ची सक्ती

राज्यातील सर्व घटकांचा सर्वंकष विकास व्हावा, याकरिता एसटी महामंडळद्वारे विविध प्रकारच्या प्रवास भाडे सवलत योजना दिल्या जातात;...

लाखांदूर : राज्यातील सर्व घटकांचा सर्वंकष विकास व्हावा, याकरिता एसटी महामंडळद्वारे विविध प्रकारच्या प्रवास भाडे सवलत योजना दिल्या जातात; मात्र अनधिकृतरीत्या तयार करण्यात आलेल्या बनावट कार्डच्या माध्यमातून या योजनांचा लाभ घेतला जात असल्याने एसटी महामंडळाच्या तिजोरीवर ताण पडत आहे.
यावर लगाम लावण्यासाठी एसटी महामंडळ सरसावले असून, प्रवास भाडे सवलत योजनांचा लाभ घेणाऱ्या प्रवाशांना यापुढे आधार कार्ड किंवा निवडणूक ओळखपत्र दाखविणे बंधनकारक राहील. त्याची त्वरित अंमलबजावणी सुरू करण्याचे निर्देश केंद्रीय वाहतूक व्यवस्थापकांनी नियंत्रकांना दिले आहेत.
समाजातील विविध सामाजिक घटकांना सामाजिक बांधीलकीच्या नात्याने एसटी महामंडळाद्वारे सुरुवातीच्या कालावधीपासून विविध प्रवास भाडे सवलत योजना प्रदान केल्या जातात. विशेषत: विविध विद्यार्थी वर्गास विविध कारणांसाठी प्रवास भाडे सवलत अनुदेय करून राज्यातील साक्षरतेचे प्रमाण वाढवून राज्याच्या प्रगतीस हातभार लावला आहे. त्याचप्रमाणे स्वातंत्र्य सैनिक, दलितमित्र पुरस्कार्थी, आदिवासी सेवक, लोकशाहीर अण्णाभाऊ साठे पुरस्कार्थी आदींच्या माध्यमातून समाजसेवेचे कार्य करणाऱ्या पुरस्कार्थींना विनामूल्य एसटी प्रवास सवलत प्रदान केली जाते.
वयाची ६५ वर्षे पूर्ण करणाऱ्या ज्येष्ठ नागरिकांना आणि अंध, अपंग व त्यांच्यावर अवलंबून असलेल्या व्यक्तींनादेखील एसटी प्रवास भाड्यात सवलत दिली जाते; मात्र जनसेवेचे हे कार्य एसटी महामंडळाच्या अंगलट येत असून, बनावट कार्ड तयार करून सवलतींचा लाभ घेणाऱ्या प्रवाशांचा सुळसुळाट झाला आहे. प्रवास भाड्यात सवलत मिळविण्यासाठी बनावट कार्ड दाखवून प्रवाशांकरवी एसटीला चुना लावला जात असल्याची शेकडो प्रकरणे आढळून आली आहेत. भंडारा विभागातदेखील बनावट कार्डधारक प्रवाशांची कमतरता नाही.
अंध, अपंग आणि ज्येष्ठ नागरिक सवलतींचे हजारो बनावट कार्ड आजतागायत अकोला विभागात जप्त करण्यात आलेत. यावर सरसकट लगाम कसण्यासाठी केंद्रीय वाहतूक महाव्यवस्थापकांनी एका परिपत्रकाद्वारे भंडारा विभाग नियंत्रकांना निर्देश दिले आहेत. (तालुका प्रतिनिधी)