पक्षांतर्गत हेवेदावे विसरून संघटित व्हा

आगामी भंडारा नगरपालिकेच्या निवडणुकीत पक्षाचे उमेदवार निवडून आणायचे आहे.

प्रफुल्ल गुडधे पाटील : काँग्रेस कमिटीची कार्यकर्ता बैठक
भंडारा : आगामी भंडारा नगरपालिकेच्या निवडणुकीत पक्षाचे उमेदवार निवडून आणायचे आहे. यासाठी पदाधिकारी व कार्यकर्त्यांमध्ये असलेले मतभेद दूर झाले पाहिजे. सर्वांनी पक्षासाठी एकत्र येवून निवडणूक लढायची आहे. कोणत्याही भुलथापांना न पडता नगरपालिकेवर काँग्रेसचा झेंडा फडकविण्यासाठी सज्ज राहा असे प्रतिपादन महाराष्ट्र प्रदेश काँग्रेस कमेटीचे महासचिव प्रफुल्ल गुडधे पाटील यांनी व्यक्त केले.
भंडारा शहर काँग्रेस कमिटी व तालुका काँग्रेस कमिटीची कार्यकर्ता सभा मुस्लिम लायब्ररी सभागृहात रविवारला पार पडली. यावेळी ते बोलत होते. भंडारा नगरपरिषदेच्या निवडणुकीतून ही सभा आयोजित केल्याने सर्वांचे याकडे लक्ष लागले होते. या बैठकीसाठी माजी आमदार आनंदराव वंजारी, विधानसभा प्रभारी मुजीब पठाण, काँग्रेस कमेटी सचिव डॉ.आसावरी देवतळे, महासचिव जिया पटेल, जिल्हाध्यक्ष प्रेमसागर गणवीर, माजी जिल्हा परिषद अध्यक्ष राजकुमार मेश्राम, अल्पसंख्यांक सेल जिल्हाध्यक्ष अनिक जमा पटेल, वैद्यकीय सेलचे जिल्हाध्यक्ष डॉ.विनोद भोयर, जिल्हा महासचिव मनोज बागडे, नगरपरिषद पक्ष नेता शमीम शेख यांची प्रामुख्याने उपस्थिती होती.
यावेळी आनंदराव वंजारी यांनी नगरपरिषदेची निवडणूक डोळ्यासमोर ठेवून वॉर्डनिहाय पदाधिकाऱ्यांच्या कमिट्या तयार करून पक्ष संघटन मजबूत करावे, निवडणूक प्रक्रियेदरम्यान पक्षाच्या वरिष्ठांच्या आदेशानुसार कार्यकर्त्यांनी काम करावे असे प्रतिपादन केले.
यावेळी मुजीब पठाण यांनी ही निवडणूक पक्षासाठी महत्वाची असून निवडणूक निकाल पक्षाच्या बाजूने लागावा यासाठी कार्यकर्त्यांनी आतापासूनच कामाला लागावे असे प्रतिपादन केले. जिया पटेल यांनी घराघरात काँग्रेस पक्षाचा कार्यकर्ता असून पक्षाला संपवू असे खोचक बोलणाऱ्या विरोधी पक्षाला हात दाखविण्याची ही संधी कार्यकर्त्याने गमावू नये. कार्यकर्त्यांनी एकमेकावर विश्वास ठेवून शहर पिंजून काढावे, असे प्रतिपादन केले. प्रेमसागर गणवीर यांनी, अच्छे दिन व काळ्या धनाचे आणि जनधन योजनेचे स्वप्न दाखविणाऱ्यांना जनतेने सत्तेत बसविले. मात्र सार्वजनिक विकासाचे व प्रगतीचे कार्य करू न शकल्याने आता जनताच त्यांना धडा शिकवेल. ही संधी भंडारा नगरपालिकेतून मिळणार असल्याने पालिकेवर काँग्रेसचे सर्वाधिक उमेदवार निवडून आणण्यासाठी प्रत्येकांनी पक्षाचे काम करावे, असे प्रतिपादन केले. यावेळी सय्यद शादाब अली, मो.वकार शेख, मो.वसी शेख, सय्यद अहेतेशाम अली, सलमान खान, जुनेद शेख, फरहान शेख, साहील बर्वे, बादल कनोजे, अखिल तांडेकर, विकास तांडेकर, अजय तांडेकर, राकेश तांडेकर, अनुग्रह बर्वे, धीरज बर्वे, आशिष बर्वे, आकाश बिंझाडे, सूरज कुंभरे, पंकज तांडेकर, विक्की बरयेकर, रोहित धकाते आदींनी काँग्रेस पक्षात प्रवेश घेतला. या बैठकीचे प्रास्ताविक सचिन घनमारे यांनी केले. संचालन राजकपूर राऊत, आभार शर्मिल बोदेले यांनी मानले. यावेळी नगरसेवक पृथ्वीराज तांडेकर, महेंद्र निंबार्ते, जि.प. सदस्य प्रेमदास वनवे, शेख नवाब, गणेश निमजे, अभिजीत वंजारी, सुभाष बोरकर, सय्यद रियाज अली, सय्यद शाहीद अली, दुर्गा फुलसुंगे, कुंदा वाघाडे, श्वेता मुटकुरे, पराग खोब्रागडे यांच्यासह कार्यकर्ते उपस्थित होते. (शहर प्रतिनिधी)