धानोरी येथील भागवत सप्ताहाचा समारोप

पवनी : तालुक्यातील धानोरी येथे हनुमान मंदिराच्या आवारात श्रीमद् भागवत सप्ताहाचे आयोजन करण्यात आले होते. प्रवचनकार ह.भ.प. रायभान दाणी महाराज यांनी प्रवचनातून अंधश्रद्धा निर्मूलन, ग्राम स्वच्छता, सर्वधर्म समभाव व व्यसनमुक्ती अशा विविध विषयांवर ग्रामस्थांना सप्ताहादरम्यान मार्गदर्शन केले.

दैनंदिन कार्यक्रमात ग्राम स्वच्छता, रामधून, प्रवचन, भारुड, कीर्तन या माध्यमातून जनजागृती करण्यात आली. समारोपप्रसंगी गोपालकाला करण्यात आला. या वेळी तालुका काँग्रेसचे अध्यक्ष शंकरराव तेलमासरे, माजी पंचायत समिती सभापती बंडू ढेंगरे, माजी जि. प. सदस्य विजय सावरबांधे, कृषी उत्पन्न बाजार समिती संचालक तोमेश्वर पंचभाई, पत्रकार संघाचे माजी अध्यक्ष अशोक पारधी, माजी सरपंच विश्रांती घुटके, पोलीस पाटील लिनता जांभुळे, सुरेश पारधी व गावातील प्रतिष्ठित नागरिक प्रमुख पाहुणे म्हणून उपस्थित होते. उपस्थित अतिथींचा शाल, श्रीफळ देऊन सत्कार करण्यात आला. त्यांच्या मार्गदर्शनानंतर गोपालकाला वितरित करण्यात आला. महाप्रसादाने भागवत सप्ताहाचा समारोप करण्यात आला. सप्ताह समिती प्रमुख नरेश जुमळे यांनी समारोप कार्यक्रमाचे सूत्रसंचालन व आभार प्रदर्शन केले. यशस्वीतेसाठी समिती सदस्यांनी अहोरात्र परिश्रम घेतले.