प्रसूतीदरम्यान बाळाच्या पायाचे हाड मोडले

जिल्हा सामान्य रुग्णालयातील डॉक्टरांच्या निष्काळजीपणामुळे नवजात बाळाच्या पायाचे हाड मोडले.

डॉक्टरांचा निष्काळजीपणा : मोफत उपचार करण्याची मागणी
मोहाडी : जिल्हा सामान्य रुग्णालयातील डॉक्टरांच्या निष्काळजीपणामुळे नवजात बाळाच्या पायाचे हाड मोडले. यात बाळाच्या भविष्याचा प्रश्न उपस्थित झाला असून रुग्णालय प्रशासनाने मात्र हात वर केल्याने त्या गरीब शेतकऱ्यावर संकट ओढवले आहे. बाळाच्या पायाची शस्त्रक्रीया रुग्णालय प्रशासनाने नि:शुल्क करून द्यावी, निष्काळजीपणाने प्रसुती करणाऱ्या डॉक्टरवर कारवाई करावी, अशी मागणी प्रेमरतन येळणे यांनी पत्रपरिषदेद्वारे केली आहे. या आशयाचे निवेदन जिल्हाधिकारी, पोलीस अधीक्षक, जिल्हा शल्यचिकित्सक यांना दिले आहे.
जवळील कुशारी येथील शारदा प्रेमरतन येळणे यांना पहिल्या प्रसुतीसाठी सामान्य रुग्णालय भंडारा येथे २७ आॅगस्टला भरती करण्यात आले. दोन दिवस ठेवल्यानंतर २९ आॅगस्ट रोजी १२ वाजताच्यादरम्यान सिझर करून प्रसुती करण्यात आली. तीन चार तासानंतर बाळाच्या डाव्या पायाच्या मोडीवर सुझन असल्याचे लक्षात आले.
दुसऱ्या दिवशी तेथेच एक्स-रे काढण्यात आला. बाळाच्या कमरेजवळील पायाकडील भागात हाडे तुटले असल्याचे निदर्शनात आले. डॉक्टरांनी थातूर माथूर उपचार करून पाच सप्टेंबर रोजी रुग्णालय सुटी दिली. मात्र बाळाच्या पायाला फायदा लागला नसल्याने सुटी दिल्यानंतर दोन दिवस रुग्णालयात ठेवले. तेथील डॉक्टरांनी नागपुरला नेण्याचा सल्ला दिला.
नागपूर येथील संकेत रुग्णालय सिताबर्डी येथे नेल्यावर त्यांनी पायाचे बेल्ट तयार करून दिले. मात्र त्या बेल्टने सुद्धा पायाला फायदा झाला नाही. जिल्हा शल्य चिकित्सकाला भेटण्यासाठी गेले असता तेथील कर्मचाऱ्यांनी हाकलून लावले. मोहाडी येथील डॉ. गिरीपुंजे यांना दाखविले असता त्यांनी एक्सरे काढला असता मांडीजवळ दोन ठिकाणी फॅक्चर असल्याने सांगितले तसेच प्रसुती करताना ओढतान केल्याने असे फॅक्चर होवू शकते, असे सांगितले.
रुग्णालय प्रशानाला प्रसुती कोणत्या डॉक्टरने केली हे विचारले असता तसेच बाळंतपणाची फाईल दाखविण्याची विनंती केली असता अर्जदार गरीब शेतमजूर असल्याने त्याला हाकलून लावण्यात आले. अर्जदार हा गरीब शेतमजूर असल्याने त्या बाळाचा उपचार करण्यास असमर्थ आहे.
लवकर त्या बाळाचा उपचार करण्यात आला नाही तर त्या बाळाला संपूर्ण आयुष्य अपंगत्वाचे जीवन जगावे लागणार आहे, असेही येळणे यांचे म्हणने आहे. प्रसुती करणाऱ्या डॉक्टरवर कारवाई करावी तसेच बाळाचा उपचार नि:शुल्क करावा, अशी मागणी पत्र परिषदेत शारदा येळणे व प्रेमरतन येळणे या दांम्पत्यांनी केली आहे.
यासंदर्भात जिल्हा शल्य चिकित्सक डॉ. रवी धकाते यांच्याशी सभ्रमणध्वनीद्वारे संपर्क केला मात्र संपर्क होऊ शकला नाही. (शहर प्रतिनिधी)