लोकमत न्यूज नेटवर्क
भंडारा : जिल्ह्यात आतापर्यंत तीन लाख ७८ हजार ६४० व्यक्तींची कोरोना चाचणी करण्यात आली असून, त्यात ५८ हजार ११६ व्यक्ती पॉझिटिव्ह आढळून आल्या आहेत. जिल्ह्यातील एकूण तपासणीच्या १५.३५ टक्के पॉझिटिव्ह रुग्ण आढळून आले आहेत. गत एप्रिल महिन्यात कोरोना संसर्गाचा उद्रेक झाला होता. आता हळुहळु रुग्णसंख्या घटू लागली आहे. त्यामुळे नागरिकांना दिलासा मिळत आहे. भंडारा जिल्ह्यात कोरोनाचा पहिला रुग्ण २७ एप्रिल २०२० रोजी आढळून आला होता. त्यानंतर रुग्णांची संख्या अगदी नगन्य होती. ऑगस्ट आणि सप्टेंबर महिन्यात रुग्णसंख्या वाढू लागली. पहिली लाट ओसरली. मात्र मार्च महिन्याच्या शेवटच्या आठवड्यापासून कोरोनाच्या दुसऱ्या लाटेचा प्रकोप सुरू झाला. एकट्या एप्रिल महिन्यात जिल्ह्यात सुमारे ३३ हजार रुग्ण आढळून आले आहेत. सर्वत्र वातावरण भयभीत झाले होते. आरोग्य यंत्रणेने प्रभावीपणे उपाययोजना करत रुग्णसंख्या आता नियंत्रणात आणली आहे. जिल्ह्यात आतापर्यंत तीन लाख ७८ हजार ६४० व्यक्तींची कोरोना चाचणी केली असता त्यात ५८ हजार ११६ व्यक्ती पॉझिटिव्ह आढळल्या. त्यात भंडारा तालुक्यात २४ हजार ४३१, मोहाडी ४२९०, तुमसर ७०२६, पवनी ५९५८, लाखनी ६४४९, साकोली ७१०६ आणि लाखांदूर तालुक्यात २८५६ रुग्ण आढळून आले आहे, तर जिल्ह्यात १०४५ व्यक्तींचा कोरोनाने मृत्यू झाला. त्यात भंडारा ४८७, मोहाडी ९३, तुमसर ११७, पवनी १०४, लाखनी ९४, साकोली १०१, लाखांदूर ४९ व्यक्तींचा समावेश आहे. आतापर्यंत झालेल्या तपासणीच्या १५.३५ टक्के व्यक्ती कोरोना पॉझिटिव्ह आढळून आल्या आहेत. इतर जिल्ह्याच्या तुलनेत हे प्रमाण कमी असल्याचे दिसून येत आहे.
मंगळवारी एकाचा मृत्यू; ११९ पॉझिटिव्ह
जिल्ह्यात मंगळवारी १६२१ व्यक्तींची चाचणी करण्यात आली. त्यात ११९ पॉझिटिव्ह आढळून आले. भंडारा तालुक्यात ४३, मोहाडी १३, तुमसर २५, पवनी १८, साकोली १८ आणि लाखांदूर येथील दोन रुग्णांचा समावेश आहे. लाखनी तालुक्यात मंगळवारी एकही रुग्ण आढळून आला नाही, तर १६९ व्यक्तींनी कोरोनावर यशस्वी मात केली आहे. पवनी तालुक्यातील एका ६५ वर्षीय पुरुषाचा कोरोनाने मृत्यू झाला.
५६ हजार १४३ कोरोनामुक्त
जिल्ह्यात आतापर्यंत ५६ हजार १४३ व्यक्ती कोरोनामुक्त झाल्या आहेत. त्यात भंडारा तालुक्यात २३ हजार ५७४, मोहाडी ४१४१, तुमसर ६८१८, पवनी ५७६७, लाखनी ६२६३, साकोली ६८४३ आणि लाखांदूर तालुक्यात २७३७ व्यक्तींनी कोरोनावर यशस्वी मात केली आहे. सध्या जिल्ह्यात ९२८ ॲक्टिव्ह रुग्ण असून, त्यात भंडारा ३७०, मोहाडी ५६, तुमसर ९१, पवनी ८७, लाखनी ९२, साकोली १६२ आणि लाखांदूर तालुक्यात ७० रुग्णांचा समावेश आहे.