परिवर्तनालाच दिली पसंती आढावा मतदारसंघाचा

भंडारा-गोंदिया लोकसभा मतदारसंघात नरेंद्र मोदी यांची लाट नसल्याचे सत्ता पक्षातील नेत्यांचे दावे भाजपच्या दणदणीत विजयानंतर सपेशल फोल ठरले.

 मतांवर परिणाम

भंडारा : भंडारा-गोंदिया लोकसभा मतदारसंघात नरेंद्र मोदी यांची लाट नसल्याचे सत्ता पक्षातील नेत्यांचे दावे भाजपच्या दणदणीत विजयानंतर सपेशल फोल ठरले. या मतदारसंघात मतदारांनी मोटी लाटेवरच शिक्कामोर्तब करुन देशाच्या सत्ता परिवर्तानात आपला वाटा मजबुत केला. या मतदारसंघातील तुमसर, भंडारा, साकोली, अर्जुनी, तिरोडा, गोंदिया या सहाही विधानसभा क्षेत्रात मोदी लाट दिसून आली. राकाँचे दिग्गज नेते प्रफुल्ल पटेल यांचा पराभव अनपेक्षित नाही, परंतु नाना पटोलेंनी घेतलेली आघाडी मात्र नक्कीच अनपेक्षित आहे. विजयाचा हा फरक दीड लाखाच्या घरात राहील, हे अपेक्षित नव्हते. खर्‍या अर्थाने हा पटेलांचा पराभव नसून मोदी लाटेचा विजय आहे, असे म्हणणे वावगे ठरणार नाही. यावेळेच्या निवडणुकीत नवमतदार ‘अ‍ॅग्रेसिव्ह’ होते. नवमतदारांसाठी बेरोजगारीचा मुद्दा होता. सामान्य नागरिकांना महागाईने त्रस्त केले होते. भ्रष्टाचाराचा मुद्दा आघाडीवर होता. त्यातच नाना पटोले यांनी २०१४ ची लोकसभा पराभूत झाल्यानंतर जोमाने कामाला लागले होते. एक दिवस प्रफुल पटेल यांना पराभूत करेन, असा निर्धार केला होता. आणि हा निर्धार त्यांनी एका पत्रपरिषदेत बोलून दाखविला होता. तो निर्धार शुक्रवारच्या विजयाने पूर्ण झाला. पूर्वी एका विधानसभेपुरते असलेले काम आता सहा विधानसभेपर्यंत वाढले आहे. त्यामुळे जनतेने सोपविलेली जबाबदारी नाना पटोले यांना पार पाडायची आहे. राष्टÑवादीच्या कार्यकर्त्यांमध्ये पक्षाबद्दलची तळमळ कमी आणि स्वार्थभाव अधिक असल्यामुळे ते मतदारांपर्यंत कसे पोहोचले, याबद्दल शंकेचे वातावरण आहे. त्यातच पटेल यांच्याभोवती वावरणार्‍या चौकडीविषयी सामान्य कार्यकर्त्यांची नाराजी यावेळी लपून राहिली नाही. विशेष म्हणजे सहापैकी दोन काँग्रेस आमदारांच्या क्षेत्रातही पटेलांना मताधिक्य घेता आले नाही, ही त्या क्षेत्रासाठी धोक्याची घंटा ठरणारी आहे. (जिल्हा प्रतिनिधी) लाखनीत भाजपने विजयी मिरवणूक काढली. या मिरवणुकीत बॅडच्या ठोक्यावर जल्लोष साजरा करताना महिला कार्यकर्त्या.