तहसीलदार संघटनेचे सामूहिक रजा आंदोलन

उमरखेड येथील नायब तहसीलदार हल्ला प्रकरण : ८ मार्चपासून बेमुदत काम बंदचा इशारा

भंडारा : उमरखेड येथील नायब तहसीलदार वैभव परब व तलाठी गजानन सुरोशे यांच्यावर रेतीमाफियांनी केलेल्या हल्ल्याचा महाराष्ट्र राज्य तहसीलदार व नायब तहसीलदार संघटनेने तीव्र निषेध केला असून, रेतीमाफिया अविनाश चव्हाणवर तात्काळ कारवाई करावी, असे निवेदन संघटनेच्या भंडारा जिल्हा शाखेने मंगळवारी जिल्हाधिकाऱ्यांना दिले. जिल्हाधिकाऱ्यांच्या वतीने तहसीलदार साहेबराव राठोड यांनी निवेदन स्वीकारले.

रेती माफियांवर तातडीने कारवाई करावी यासाठी महाराष्ट्र राज्य तहसीलदार व नायब तहसीलदार संघटनेने २ फेब्रुवारी रोजी राज्यभर सामूहिक रजा आंदोलन केले. भंडारा येथे तहसीलदार अक्षय पोयम यांच्या अध्यक्षतेखाली जिल्ह्यातील उपजिल्हाधिकारी, तहसीलदार, नायब तहसीलदार आजच्या सामूहिक रजा आंदोलनात सहभागी झाले होते.

महाराष्ट्र राज्य तहसीलदार व नायब तहसीलदार संघटना २ फेब्रुवारी रोजी राज्यभर सामूहिक रजा आंदोलन करणार असल्याचे कार्याध्यक्ष सुरेश बगळे यांनी महसूलमंत्री बाळासाहेब थोरात यांना दिलेल्या निवेदनात म्हटले होते. प्रत्येक जिल्ह्यातील संघटनेच्या पदाधिकाऱ्यांनी सामूहिक रजा आंदोलन करून २ फेब्रुवारी रोजी जिल्हाधिकाऱ्यांना याबाबतीत निवेदन देण्याचे आवाहन त्यांनी केले होते. त्यानुसार मंगळवारी भंडारा जिल्हा संघटनेच्या पदाधिकाऱ्यांनी सामूहिक रजा आंदोलन केले.

सदर आंदोलनाची व संघटनेच्या मागण्यांची शासन स्तरावर योग्य दखल न घेतल्यास ८ मार्चपासून राज्यातील सर्व तहसीलदार व नायब तहसीलदार बेमुदत कामबंद आंदोलन करतील व या आंदोलनात सर्व उपजिल्हाधिकारी सहभाग घेतील, असे निवेदनात म्हटले आहे.

संघटनेने दिलेल्या निवेदनात हल्लेखोर कुख्यात गुंड रेती माफिया अविनाश चव्हाण याच्यासह त्याचे सर्व साथीदार, रेती वाहतूक करणाऱ्या वाहनांचे मालक, चालक या सर्वांवर तातडीने संघटित गुन्हेगारी कायदा (मकोका) अंतर्गत गुन्हे दाखल करून संबंधित आरोपींना तात्काळ अटक करण्यात यावी. अनधिकृत रेती वाहतूक करणारे रेती माफिया यांच्याकडून महसूल अधिकारी व कर्मचारी यांच्यावर वारंवार जीवघेणे हल्ले होतात. याला आळा बसावा म्हणून शासनाने तातडीने पावले उचलावीत या प्रमुख मागणीसह अन्य मागण्यांचा समावेश आहे. जिल्ह्यातील सर्व उपजिल्हाधिकारी, तहसीलदार, नायब तहसीलदार व महसूल कर्मचारी या आंदोलनात सहभागी झाले होते.