कोंढा - कोसरा (भंडारा) : गोसे धरणाच्या बॅक वॉटरमध्ये एका तरूणाचा मृतदेह आढळून आल्याची घटना भंडारा तालुक्यातील जाख येथे शुक्रवारी दुपारी उघडकीस आली. मृतकाच्या खिशातील आधारकार्ड वरून त्याची ओळख पटली.
कार्तिक सोमाजी मडावी (२१) रा. धारगाव ता. भंडारा असे मृताचे नाव आहे. जाख गावाजवळील धरणाच्या बॅक वॉटरमध्ये एका तरुणाचा मृतदेह पाण्यावर तरंगताना शेतकरी शैलेश शेळके यांना दिसला. त्यांनी लगेच जाखचे पोलीस पाटील सुभाष पडोळे यांना माहिती दिली. त्यांनी अड्याळ पोलिसांना माहिती देताच पोलिसांनी घटनास्थळ गाठले.
गावातील तरुणांच्या मदतीने मृतदेह पाण्याच्या बाहेर काढण्यात आला. तीन ते चार दिवसांपूर्वी त्याचा मृत्यू झाला असावा असा अंदाज आहे. सुरूवातीस ओळख पटविण्यात अडचण येत होती. काही वेळात अंगावरील कपड्यांची तपासणी केली असता आधार कार्ड आढळले. त्यावरून तो कार्तिक मडावी असल्याचे पुढे आले.
तरूणाची हत्या की आत्महत्या
धारगाव येथील तरुणाचा मृतदेह आढळून जाख येथे आढळून आल्याने त्याने आत्महत्या केली की, त्याची कुणी हत्या केली असा संशय व्यक्त केला जात आहे. अड्याळ पोलीस या प्रकरणाचा तपास करीत आहे. तूर्तास मृतकाचा मोठा भाऊ नागेश्वर मडावी याच्या तक्रारीवरून अकस्मात मृत्यूची नोंद घेण्यात आली आहे. या घटनेमुळे परिसरात एकाच एकच खळबळ उडाली आहे. ठाणेदार सुधीर बोरकुटे यांच्या मार्गदर्शनात पोलीस हवालदार फुलचंद मेश्राम तपास करीत आहेत.