वरठीत तरुणाचा निर्घृण खून

उधारीचे पैसे मागितले, या कारणावरुन पाच जणांनी एका तरुणाचा धारदार शस्त्राने खून केला. ही घटना सोमवारी रात्री १०.३० वाजताच्या सुमारास स्थानिक गांधी वॉर्ड येथे घडली. यातील पाचही आरोपी फरार

आरोपी सराईत गुन्हेगार : पैशाच्या वादातून घडला प्रकार
वरठी : उधारीचे पैसे मागितले, या कारणावरुन पाच जणांनी एका तरुणाचा धारदार शस्त्राने खून केला. ही घटना सोमवारी रात्री १०.३० वाजताच्या सुमारास स्थानिक गांधी वॉर्ड येथे घडली. यातील पाचही आरोपी फरार असून पोलीस त्यांच्या मागावर आहेत.
विजय अंकालू कोलीयारे (२१) असे मृतकाचे नाव असून मंगेश वासनिक, सोनू वासनिक, राजेश वासनिक, शैलेश भोवते व रवी कांबळे ही फरार आरोपींची नावे आहेत. मृतक विजय हा छत्तीसगड राज्यातील असून मागील अनेक वर्षांपासून त्याचे वडिल गांधी वॉर्डात राहत आहेत. विजयने मंगेश वासनिक याला पैसे उधारीवर दिले होते. विजय व मंगेश यांच्यात काही दिवसांपासून पैसे मागण्याच्या कारणावरून वाद सुरु होता. घटनेच्या रात्री विजय व मंगेश यांच्यात दुपारपासून वाद सुरु झाला. अनेकदा झालेले भांडण इतरांच्या मध्यस्थीने मिटायचे व पुन्हा भांडण व्हायचे हा नेहमीचा प्रकार होता.
सोमवारी रात्री १०.३० वाजताच्या सुमारास विजय व त्याचा मित्र विकास मेश्राम हा मंगेश वासनिक यांच्याकडे पैसे मागण्यासाठी गेले. त्यावेळी कशाचे पैसे म्हणून त्यांच्यात भांडण झाले. मंगेशने सोनू वासनिक, राजेश वासनिक, शैलेश भोवते व रवी कांबळे यांना बोलावले व विजय कोलीयारे याच्यावर धारदार शस्त्राने वार केले. यावेळी विजयचा मित्र विकास मेश्रामलाही बेदम मारहाण केली. त्यानंतर ते पाचही आरोपी फरार झाले. घटनेची माहिती विजयच्या कुटुंबांना मिळताच त्यांनी विजयला रुग्णालयात हलविले परंतु उपचारापूर्वीच त्याचा मृत्यू झाला होता.
रात्रीपासून घटनास्थळावर तगडा पोलीस बंदोबस्त आहे. पोलीस अधीक्षक कैलाश कणसे, पोलीस निरीक्षक मारूती शेंडे यांच्यासह पोलीस उपनिरीक्षक वाकडे हे प्रकरणावर लक्ष ठेवून आहेत. वरठी पोलीस चौकीचे सहाय्यक उपनिरीक्षक तुकाराम गभणे, इलमकर, महादेव वंजारी हे आरोपीच्या शोधात पथके रवाना केले आहेत. मृतक विजयचा भाऊ देवानंद कोलीयारे यांच्या तक्रारीवरून पोलिसांनी पाचही आरोपीविरुद्ध भादंवि ३०२, १४३, १४७, १४८, १४९ व ४/२५ कलमान्वये गुन्हा दाखल केला. (वार्ताहर)