चार तालुक्यात भाजप तर तीन ठिकाणी काँग्रेसची सत्ता

जिल्ह्यातील सात पंचायत समितींच्या सभापती व उपसभापती पदाकरीता रविवारला निवडणूक पार पडली.

भंडारा : जिल्ह्यातील सात पंचायत समितींच्या सभापती व उपसभापती पदाकरीता रविवारला निवडणूक पार पडली. भंडारा, तुमसर, साकोली व मोहाडी पंचायत समितीत भाजपला तर पवनी, लाखनी व लाखांदूर पंचायत समितीत काँग्रेसला स्पष्ट बहुमत असल्यामुळे स्वपक्षातील सदस्यांची सभापती व उपसभापतिपदी वर्णी लागली आहे. असे असले तरी भाजपने तुमसर व भंडाऱ्यात शिवसेनेशी युती करुन आम्ही एक असल्याचे सांगितले.
भंडारा : येथील पंचायत समितीच्या सभापतीपदी भाजपचे प्रल्हाद नंदू भुरे तर उपसभापती पदावर शिवसेनेचे ललीत फाल्गुन बोंद्रे यांची निवड करण्यात आली. सभापती पदासाठी राष्ट्रवादी पक्षाच्या सुजाता फेंडर यांनी तर उपसभापती पदासाठी काँग्रेसच्या अनिता नागफासे यांनीही अर्ज सादर केला होता. मात्र भाजप-शिवसेनेच्या युतीमुळे भाजप-सेनेचे दोन्ही उमेदवार १२ विरूद्ध ८ मतांनी निवडून आले. निवडणूक निर्णय अधिकारी म्हणून भंडाऱ्याचे उपविभागीय अधिकारी डॉ. संपत खिल्लारी, सहायक निवडणूक अधिकारी म्हणून तहसीलदार सुशांत बनसोडे, खंडविकास अधिकारी मंजुषा ठवकर यांनी काम पाहिले. निवडणुकीनंतर भाजप - सेनेच्या कार्यकर्त्यांनी ढोलतांशांच्या गजरात मिरवणूक काढून व फटाक्यांची आतषबाजी करून विजयोत्सव साजरा केला.
लाखांदूर : पंचायत समिती लाखांदूरच्या सभापती व उपसभापती निवडणुकीत बारव्हा पंचायत समितीमधून निवडून आलेल्या काँग्रेसच्या मंगला बगमारे सभापती व उपसभापती पदावर वासूदेव तोंडरे यांची ८ विरुध्द ४ मताने निवड झाली. निवडणुकीत काँग्रेसला ७ भाजपा ४ तर राष्ट्रवादी काँग्रेसला १ जागा मिळाली होती. काँग्रेसची पंचायत समितीवर सत्ता स्थापन होणार हे निश्चित असताना सभापती पदाच्या रस्सीखेचमध्ये काँग्रेस गटात ‘तु-तु-मै-मै’ सुरु असतांना विजयी उमदेवारांमध्ये ओढताण सुरु झाली होती. अखेर माजी आमदार सेवक वाघाये व नवनिर्वाचित जि.प. सदस्य रमेश डोंगरे यांनी मध्यस्थी करुन काँग्रेस गटातील सर्व पं.स. सदस्यांना एकमताने सभापती-उपसभापती पदाच्या निवडीत सहकार्य करण्याचा इशारा दिल्याने अखेर ८ विरुध्द ४ मताने मंगला बगमारे यांची सभापती म्हणून तर सरांडी पंचायत समिती क्षेत्रातून निवडून आलेले वासूदेव तोंडरे यांची उपसभापती पदी निवड करण्यात आली. निवडणूक निर्णय अधिकारी म्हणून उपजिल्हाधिकारी जी.जी. जोशी तर सहायक निवडणूक अधिकारी म्हणून विजय पवार, विजय झिंगरे यांनी काम पाहिले.
मोहाडी : येथील पंचायत समिती सभागृहात सभापती व उपसभापती पदाची निवडणूक पार पडली. निवडणूकीत सभापती म्हणून भाजपाचे हरिशचंद्र बंधाटे व विलास गोबाडे यांची उपसभापतीपदी वर्णी लागली. सभापती पदासाठी भाजपाकडून हरिशचंद्र बंधाटे यांनी तर राष्ट्रवादी पक्षाकडून महादेव पचघरे यांनी फार्म भरला होता. तसेच उपसभापतीपदासाठी भाजपाकडून विलास गोबाडे व राष्ट्रवादीकडून अश्वनिता लेंडे यांनी फार्म भरला. सभापती म्हणून बंधाटे ११-०३ च्या फरकाने व तितक्याच फरकाने उपसभापतीसाठी गोबाडे यांना उपसभापती निवडून आल्याचे जाहिर करण्यात आले. पक्षीय बलाबलमध्ये भाजप ९, राष्ट्रवादी २, काँग्रेस १, सेना १, अपक्ष १ असे सदस्य आहेत.
पवनी : पंचायत समिती पवनी येथे झालेल्या सभापती, उपसभापती निवडणूकीत काँग्रेसचे वर्चस्व प्रस्थापित झाले. सभापती पदी अर्चना वैद्य तर उपसभापती पदावर अल्का विनोद फुंडे यांची वर्णी लागली. सभापती पदाच्या निवडणुकीत काँग्रेसच्या अर्चना वैद्य यांनी त्यांचे प्रतीस्पर्धी भाजपच्या अस्मीता सलामे यांचा १२-०२ ने पराभव करुन सभापती पदावर अर्चना वैद्य विजयी झाल्या. उपसभापती पदाकरिता काँग्रेसच्या अल्का विनोद फुंडे यांची अविरोध निवड करण्यात आली. सभापतीपद हे महिला ओबीसी करीता राखीव आहे. पं.स. सदस्य मंगला रामटेके, मधु श्रावण गभणे, अस्मीता सलामे, वनीता नवघरे, तुळशीराम कोल्हे, कल्पना गभणे, माधुरी मेश्राम, तोमेश्वर पंचभाई, मंगेश ब्राम्हणकर, अर्चना वैद्य, अल्का फुंडे, राजकुमार मेश्राम, मनोहर आकरे, बंडू ढेगरे उपस्थित होते. काँग्रेस ७, भाजपा २, अपक्ष ३, सेना १, राष्ट्रवादी काँग्रेस १ अशी संख्याबळ असून एकुण १४ सभासद उपस्थित होते.
तुमसर : तुमसर पंचायत समितीच्या सभापती, उपसभापती पदाच्या निवडणूकीत १२-०८ च्या फरकाने विजय मिळवून भाजप सेनेने तुमसर पं.स. वर वर्चस्व राखले. तुमसर पंचायत समितीमध्ये भाजप ९, राकॉ ७, सेना २, काँग्रेस १, अपक्ष १ असे पक्षीय बलाबल आहे. यात भाजप सेनेची युती झाली तर राकाँ, काँग्रेसचे सदस्य एकत्र आल्याने सभापती, उपसभापती पदाची निवडणूक घेण्यात आली. सभापती पदाकरिता भाजपच्या कविता बंडू बनकर तर राष्ट्रवादी कडून सुप्रिया किशोर राहांगडाले यांनी उमेदवारी अर्ज दाखल केले. उपसभापती पदाकरिता युतीतर्फे सेनेचे शेखर राजैय्या कोतपल्लीवार तर राष्ट्रवादीकडून राजेंद्र अंबादास ढबाले यांनी उमेदवारी दाखल केली. परंतू अपक्ष सदस्यातही युतीला समर्थन दिल्याने सभापतीपदी कविता बनकर १२ तर सुप्रिया राहांगडाले यांना ०८ मते तर उपसभापती पदाकरिता शेखर कोतपल्लीवार यांना १२ तर राजेंद्र ढबाले यांना ०८ मते पडल्याने भाजप सेनाचा उमेदवारांना विजयी करण्यात आले. निवडणूक अधिकारी म्हणून उपविभागीय अधिकारी शिल्पा सोनुले यांनी काम पाहिले.
साकोली : पंचायत समिती साकोलीच्या सभापती व उपसभापती पदाच्या पार पडलेल्या निवडणूकीत भाजपाचे धनपाल उंदिरवाडे सभापती तर उपसभापती म्हणून लखन बर्वे यांची निवड करण्यात आली. साकोली पंचायत समितीवर भाजपाची सत्ता स्थापन झाली आहे. आज दुपारी निवडणूक निर्णय अधिकारी दिलीप तलमले, तहसिलदार डॉ. हंसा मोहने, प्रभारी खंडविकास अधिकारी झंझाड यांच्या उपस्थितीत सभापती व उपसभापती यांची निवड करण्यात आली. यात सभापती म्हणून धनपाल उंदीरवाडे यांची अविरोध निवड करण्यात आली. उपसभापती पदासाठी लखन बर्वे तर काँग्रेसचे राजकुमार पुराम यांनी उमेदवारी अर्ज दाखल केला होता. यात लखन बर्वे यांना ०८ मते मिळाली.पुराम यांना ०३ मते मिळाली. त्यामुळे उपसभापती म्हणून लखन बर्वे यांची निवड झाली.यावेळी आ. बाळा काशिवार, धनंजय मोहकर, जि.प. सदस्य नेपाल रंगारी, सभापती रेखा भाजीपाले, बंडू बोरकर, सत्यवान हुकरे, नितीन खेडीकर उपस्थित होते. पंचायत समिती क्षेत्रातून भाजपाचे ०८ तर काँग्रेसचे ४ सदस्य निवडून आली. त्यामुळे स्पष्ट बहुमत भाजपला आले. मात्र उपसभापतीच्या निवडणूकीत काँग्रेसचे राजकुमार पुराम यांनीही दावेदारी केली. यात भाजपाला ०८ मते तर काँग्रेसला ०३ मते मिळाली. त्यामुळे ०१ मत तटस्थ राहीला. यात उमदेवार राजकुमार पुराम यांनी हात वर केला नाही. त्यामुळे त्यांचेच मत त्यांना मिळाले नाही.
दरम्यान सभापती उपसभापतीची निवडणुकीत भाजपला स्पष्ट बहुमत असले तरी भाजप सदस्यात आपसी मतभेद होऊ नये यासाठी सर्व ८ ही सदस्यांना दोन दिवसापुर्वी पछमडी दर्शनाखाली नेण्यात आले होते व आज सकाळी त्यांना साकोली येथे आणण्यात आले.
लाखनी : स्थानिक पंचायत समितीच्या सभागृहात सभापती व उपसभापती पदाची निवडणूक पार पडली. सभापती पदावर काँग्रेसच्या रजनी रघुनाथ आत्राम यांची अविरोध निवड झाली. लाखनी पंचायत समितीचे सभापती पद अनुसूचित जमाती महिलासाठी राखवी होते. काँग्रेसच्या रजनी आत्राम सभापती पदाच्या एकमेव दावेदार असल्यामुळे त्यांना विजयी घोषित करण्यात आले. उपसभापतीपदाच्या निवडणुकीत काँग्रेसचे विजय जैराम कापसे व अपक्ष उमेदवार संजय लक्ष्मण डोळस यांनी अर्ज दाखल केला होता.
निवडणूकीत विजय कापसे यांना ८ मते मिळाली तर संजय डोळस यांना ४ मत मिळाली. निवडणुक प्रक्रियेत पंचायत समिती सदस्य दादु खोब्रागडे, खुशाल गिदमारे, मोरेश्वरी पटले, मुनिश्वर नंदेश्वर, रजनी पडोळे, घनश्याम देशमुख, मोनाली गाढवे, वंदना गवळे, कानतोडे सहभागी झाले होते. निवडणुक निर्णय अधिकारी म्हणून उपजिल्हाधिकारी अशोक लटारे, तहसिलदार डी. सी. बांर्बोडे, खंडविकास अधिकारी हेंमत मेहर, श्रीकांत नागलवाडे यांनी निवडणुक प्रक्रीया पार पाडली. (लोकमत न्युज नेटवर्क)