भवसागर, श्यामकुवर विजयी

तुमसर नगरपरिषदेच्या पोटनिवडणुकीत राष्ट्रीय पक्षाच्या उमेदवारांचा पराभर करीत अपक्ष उमेदवार किशोर भवसागर यांनी दणदणीत विजय संपादन केला.

पोटनिवडणूक : तुमसरात अपक्षाची तर लाखनीत काँग्रेसची बाजी
तुमसर : तुमसर नगरपरिषदेच्या पोटनिवडणुकीत राष्ट्रीय पक्षाच्या उमेदवारांचा पराभर करीत अपक्ष उमेदवार किशोर भवसागर यांनी दणदणीत विजय संपादन केला.
अपक्ष उमेदवार किशोर भवसागर यांना १,१६१ मते मिळाली. राष्ट्रवादी काँग्रेसचे प्रमोद गडपायले यांना ७५४ मते, अनिल सावठणे यांना ६९९ मते, भाजपचे नवनाथ मेश्राम यांना ५३६ मते, काँग्रेसचे निलेश वासनिक यांना २४९, सुधिर दहाट १३४ मते, नितिन गजभिये यांना १०५ मते मिळाली. भवसागर यांचे मोठे बंधु व पत्नी या नगरसेविका म्हणून निवडून आले होते, हे विशेष. प्रभाग क्रमांक १ मध्ये नगरसेवक पदाच्या जागेकरिता पोटनिवडणूक घेण्यात आली. आठ महिन्याचा कालावधी नगरसेवकाला मिळणार असल्याने राष्ट्रीय पक्षाने उमेदवार लढविणार नाहीत, असे वाटत होते. परंतु आगामी विधान परिषद निवडणूक लक्षात घेऊन सर्वच राष्ट्रीय पक्षांनी उमेदवार रिंगणात उतरविले होते. परंतु प्रभाग क्रमांक १ च्या मतदारांनी पक्षाच्या उमेदवारांना नापसंती दर्शवून अपक्ष उमेदवार किशोर भवसागर यांना पसंती दिली. (शहर प्रतिनिधी)
लाखनी : पिंपळगाव (सडक) पंचायत समिती क्षेत्राच्या पोटनिवडणुकीत काँग्रेसचे पंकज श्यामकुंवर हे विजयी झाले. त्यांनी भाजपचे सुबोध मेश्राम यांचा पराभव केला.
काँग्रेसचे पंकज श्यामकुंवर यांना २०७७, भाजपचे सुबोध मेश्राम यांना १९६४, राष्ट्रवादी काँग्रेसचे सुधीर मेश्राम यांना ४२८, बसपाच्या हर्षदीप गणवीर यांना ३८९ मते मिळाली. नोटाला ९९ मतदारांनी प्रतिसाद दिला. तहसिल कार्यालयात सकाळी १०.३० वाजता मतमोजणीला सुरूवात झाली.
यावेळी निवडणूक निर्णय अधिकारी तहसीलदार डी. सी. बोंबर्डे, सहायक निवडणुक अधिकारी नायब तहसीलदार एस. ए. धारगडे, धुर्वे, गेडाम, श्रीकांत नागलवाडे, नीळकंठ गोटेफोडे, शिवणकर, मोहोड, गिऱ्हेपुंजे यांनी काम पाहिले. विजयाच्या घोषणेनंतर विजयी उमेदवारांची मिरवणुक काढण्यात आली. यात जिल्हा परिषद सदस्य आकाश कोरे, तालुका अध्यक्ष सुनिल गिऱ्हेपुंजे, होमराज बोरकर, जितेंद्र भदाडे, रूपलता जांभुळकर, अश्विन गोस्वामी, राजकमल उके सहभागी झाले होते. (तालुका प्रतिनिधी)

राष्ट्रवादीने दिला दगा -वाघाये
लाखनी तालुक्यातील पिंपळगाव पंचायत समिती क्षेत्राचे सदस्य मुन्नेश्वर नंदेश्वर यांचे निधन झाले होते. अशा स्थितीत काँग्रेसला राष्ट्रवादी काँग्रेसने उमेदवार उभा न करता मदत करता येऊ शकली असती. परंतु भाजपच्या विजयासाठी राष्ट्रवादीने उमेदवार उभा केला. असे असतानाही काँग्रेसने ही जागा जिंकली. राष्ट्रवादी काँग्रेसकडून आमचा नेहमी विश्वासघात होतो. यापूढे कोणत्याही निवडणुकीत राष्ट्रवादीला पाठिंबा देण्यात येणार नाही, अशी भूमिका आम्ही घेतली आहे. ही भूमिका येत्या विधान परिषद निवडणुकीत त्यांना दाखवू, असा इशाराही माजी आमदार सेवक वाघाये यांनी दिला.