हेल्मेट न घालणाऱ्या ४४९८ चालकांवर कारवाई

संतोष जाधवर / भंडारा : जिल्हा वाहतूक शाखेला प्राप्त इंटरसेप्टर वाहनांतील स्पीडगनच्या साहाय्याने वर्षभरात ४४९८ विनाहेल्मेट दुचाकीचालकांवर दंडात्मक कारवाई करण्यात आली. त्यांना २२ लाख ४९ हजार रुपयांचा दंड ठोठावण्यात आला. जिल्ह्यात हेल्मेट सक्तीला शिथिलता असली तरी राष्ट्रीय महामार्गावरुन जाणाऱ्या दुचाकी चालकांवर वाहतूक पोलिसांची करडी नजर असते.

अपघातात मृत्यूचे प्रमाण वाढण्यामागील महत्वाचे कारण म्हणजे विनाहेल्मेटने दुचाकी चालविणे होय. त्यामुळेच दुचाकी चालकांना हेल्मेट सक्ती करण्यात आली. दुचाकी खरेदी करताना हेल्मेट खरेदी करणे सक्तीचे करण्यात आले. मात्र त्यानंतरही जिल्ह्यात अनेक जण हेल्मेट अडगळीत ठेवून सुसाट वेगाने वाहन चालविताना दिसतात. अशा बेदरकार वाहन चालकांवर वाहतूक पोलिसांकडून कारवाई केली जाते. मात्र वर्षभरापूर्वी जिल्हा पोलीस दलात दाखल झालेल्या स्पीडगनने विना हेल्मेट वाहन चालकांची नोंद घेतली. पोलिसांनी त्यांना ई-चालान पाठवून दंड ठोठावला. जिल्ह्यात जानेवारी महिन्यात ८४ वाहनचालकांना ४२ हजार रुपये दंड ठोठावण्यात आला. फेब्रुवारी महिन्यात २९२ दुचाकीचालकांना १ लाख ४६ हजार रुपये दंड, मार्च महिन्यात ३०४ चालकांवर कारवाई करून १ लाख ५२ हजार रुपये दंडाची वसुली करण्यात आली. एप्रिल महिन्यात ४३५, मे ३७६, जून २२६, जुलै २३३, ऑगस्ट २७६, सप्टेंबर ४४१, ऑक्टोबर ५७०, नोव्हेंबर ६१७, डिसेंबर ६४४ अशी ४४९८ वाहनांवर कारवाई करून २२ लाख ४९ हजार रुपये दंड ठोठावण्यात आला.

इंटरसेप्टर वाहनातील स्पीडगनचा वापर

वाहतूक शाखेकडे उपलब्ध असलेले इंटरसेप्टर वाहन राष्ट्रीय महामार्गावर उभे केले जाते. या वाहनातील स्पीडगनच्या रेंजमध्ये येणाऱ्या वाहनांचे स्कॅनिंग होते. हेल्मेट न घालणाऱ्या दुचाकीचालकांची नोंद होते. त्याबाबत नोंद होऊन ऑनलाईन कारवाई केली जाते. अनेकांना तर आपल्यावर कारवाई झाली हेही वाहनचालकांना ई-चलान प्राप्त झाल्यावरच माहीत होते.

जिल्हा पोलीस अधीक्षक वसंत जाधव यांनी पोलीस दलातील सर्व कर्मचाऱ्यांना हेल्मेट सक्ती केली आहे. लवकरच नागरिकांनाही हेल्मेट सक्ती केली जाईल. वाहन चालविताना सुरक्षेच्या दृष्टीने हेल्मेट घालणे आवश्यक आहे. मात्र अनेक जण आजही विना हेल्मेट वाहन चालविताना दिसतात. वाहतूक शाखेला प्राप्त इंटरसेप्टर वाहनाच्या मदतीने आता कारवाई होत आहे.

-शिवाजी कदम, प्रमुख, वाहतूकशाखा