भदंत नागपथ यांचा अपघाती मृत्यू

भरधाव अज्ञात वाहनाने एका ४५ वर्षीय बौद्ध भिक्खूला चिरडल्याने त्यांचा जागीच मृत्यू झाला.

महामार्गावरील घटना : भंडाऱ्यातच केले अत्यंसंस्कार
भंडारा : भरधाव अज्ञात वाहनाने एका ४५ वर्षीय बौद्ध भिक्खूला चिरडल्याने त्यांचा जागीच मृत्यू झाला. ही घटना रविवारी रात्री ११.३० वाजताच्या सुमारास महामार्गावरील सेंटपॉल स्कुलसमोर घडली. भदंत नागपथ (४५) असे मृताचे नाव आहे.
रविवारी रात्री भदंत नागपथ हे पायदळ महामार्गाच्या कडेने जात होते. दरम्यान एका अज्ञात वाहनाने त्यांना मागून जोरदार धडक दिली. यात त्यांचा मृत्यू झाला. त्यानंतर त्यांचा मृतदेह रस्त्यावर पडून होता. त्यावरून अनेक वाहने गेल्यामुळे त्यांच्या मृतदेहाचा अक्षरश: चेंदामेंदा झाला. घटनेची माहिती गस्तीवर असलेल्या नौशाद खान, वाहतूक पोलीस जांगळे या पोलिसांना कळताच त्यांनी भंडारा पोलिसांना कळविले. सहायक पोलीस निरीक्षक रायपूरकर हे ताफ्यासह घटनास्थळी दाखल झाले. त्यांनी सामान्य रूग्णालयाशी संपर्क साधून छिन्नविछीन्न पसरलेले तुकडे जमा करून मृतदेह जिल्हा सामान्य रूग्णालयातील शवविच्छेदनगृहात ठेवले. याप्रकरणी भंडारा पोलिसांनी अज्ञात वाहन चालकाविरूध्द गुन्हा नोंदविला आहे. सोमवारला त्यांचा मृतदेह कुटुंबीयाना सोपविण्यात आला. त्यांच्या पार्थिवावर वैनगंगा नदीकाठावर बौद्ध रितीरिवाजाप्रमाणे अत्यंसंस्कार करण्यात आले. यावेळी डॉ. भदंत धम्मदीप महाथेरो, भिक्क्षु नागसेन, विनयबोधी, सुगत गयाकश्यप, भिक्क्षुनी धम्मदिन्ना यांच्यासह बौध्द बांधव उपस्थित होते. (नगर प्रतिनिधी)

बौद्ध धम्माचे होते प्रसारक
भदंत नागपथ हे २० वर्षांपासून बौध्द धम्माचा प्रचार व प्रसार करीत होते. तत्पूर्वी ते भंडारा तालुक्यातील खुटसावरी या मुळगावी राहत होते. अरविंद मोडकूजी वासनिक असे त्यांचे पुर्वाश्रमीचे नाव आहे. त्यांच्यामागे पत्नी, दोन मुली असा आप्त परिवार आहे.