भंडारा : राष्ट्रीय महामार्गावर धावत्या कारवर निंबाचे झाड कोसळल्याची घटना शहरातील जिल्हाधिकारी कार्यालयासमोर शनिवारी सकाळी ८.४५ वाजताच्या सुमारास घडली. सुदैवाने कारमधील कुणालाही इजा झाली नाही. मात्र राष्ट्रीय महामार्गावरील वाहतूक ठप्प झाली.
सततच्या पावसाने राष्ट्रीय महामार्गाच्या कडेला असलेले इंग्रजकालीन विशाल निंबाचे झाड अचानक कोसळले. त्याच वेळी या महार्गावरून एक कार जात होती. त्या कारवरच झाड कोसळले. मात्र कारमधील कुणालही इजा झाली नाही. विशेष म्हणजे सकाळच्या वेळी या परिसरात मोठी वर्दळ असते. अनेक वाहने येथून जात असतात. तसेच या झाडाजवळच वाहतूक पोलीस उभे असतात. सुदैवाने मोठा अपघात टळला.
झाड कोसळल्यानंतर मार्गावरील वाहतूक ठप्प झाली असून दोन्ही बाजूल वाहनांच्या रांगा लागल्या आहे. पोलिसांनी घटनास्थळी धाव घेतली असून झाड रस्त्याच्या बाजूला करण्याचे काम सुरु आहे.