Numerology: नवग्रहांचा राजकुमार मानला गेलेला बुध ग्रह नोव्हेंबर महिन्याच्या अखेरीस राशीपरिवर्तन करत आहे. डिसेंबर महिन्यात बुध ग्रह वक्री होणार आहे. बुध ग्रह उत्तम बुद्धी, तर्कक्षमता कारक असल्याचे सांगितले जाते. ज्योतिषशास्त्राच्या अनेकविध शाखा आहेत. यापैकी एक शास्त्र आहे अंकशास्त्र. अंकशास्त्रात जन्मतारखेवर आधारित मूलांकावरून व्यक्तीचा स्वभाव, वैशिष्ट्य, भविष्यकथन केले जाते. जसा प्रत्येक राशीचा स्वामी असतो, तसेच प्रत्येक मूलांकालाही ग्रहांचे स्वामित्व बहाल केलेले आहे. अंकशास्त्रानुसार, ज्या व्यक्तींचा जन्म ५, १४ आणि २३ या तारखेला झाला आहे. त्यांचा मूलांक ५ आहे. बुध हा मूलांक ५ चा स्वामी आहे.
पंचांग, नक्षत्र, ग्रह-तारे यांचे चलन, परिभ्रमण यांच्या अभ्यासातून मानवी जीवनावरील प्रभाव पाहिला जातो. अंकशास्त्राच्या माध्यमातूनही भविष्यकथन करता येते. मूलांक ५ असलेल्या व्यक्तींवर धनदेवता कुबेरांची विशेष कृपा असते. तसेच या मूलांकाच्या व्यक्तींना लक्ष्मी देवाची शुभाशिर्वाद प्राप्त होऊ शकतात, असे म्हटले जाते. यामुळे पैशांची चणचण भासत नाही, आर्थिक स्थिती मजबूत राहू शकते. धनलाभ होऊ शकतात, असे सांगितले जाते.
या व्यक्ती मनमिळावू आणि प्रतिभावान असतात
मूलांक ५ असलेल्या व्यक्तींचा स्वभाव मनमिळाऊ असतो. या मूलांकाचे लोक प्रतिभावान असतात. आयुष्यात येणाऱ्या प्रत्येक आव्हानाला ते सामोरे जाण्यास तयार असतात आणि त्यात ते विजयही मिळवतात. धाडसी, निर्भयी आणि मेहनती असतात. ते कधीही हार मानत नाहीत आणि सर्व प्रकारच्या समस्यांना तोंड देण्यासाठी नेहमी तयार असतात, असे मानले जाते.
प्रत्येक गोष्ट स्वतःच्या पद्धतीने करायला आवडते
मूलांक ५ असलेल्या व्यक्तींना भाग्याची आणि नशिबाची उत्तम साथ मिळते. यासह नेहमी पुढे जाण्याचा मार्ग शोधत असतात. कामात कोणाची ढवळाढवळ त्यांना आवडत नाही. कारण त्यांना प्रत्येक गोष्ट त्यांच्या पद्धतीने करायला आवडते. या व्यक्ती बुद्धिमान असतात. लहान वयात ते मोठ्या हुद्यावर पोहोचतात. कामे करून घेण्यात या व्यक्ती पटाईत असतात. जीवनातील सर्व सुख प्राप्त होते. पैशाची कधीच कमतरता नसते. ते पहिल्यापासूनच त्यांच्या भविष्याबद्दल विचार करत असतात.
तर्क क्षमता अन् संवाद कौशल्य चांगले असते
मूलांक ५ असलेल्या व्यक्ती खूप आकर्षक असतात. बुध वाणीचा कारक मानला गेला आहे. आपल्या बोलण्याने वाणीमुळे समोरच्या व्यक्तींवर प्रभाव पडतो. तर्क करण्याची क्षमता आणि संवाद कौशल्य खूप चांगले असते. जनसंपर्क, मित्र परिवार खूप मोठा असतो. कौटुंबिक जीवनही आनंदी असते, असे म्हटले जाते.
कोणत्या क्षेत्रात उत्तुंग भरारी, यश-प्रगती होते?
मूलांक ५ असलेल्या लोकांना व्यापार, उद्योगात चांगले यश मिळते. हे लोक मनी माइंडेड आणि बिझनेस माइंडेड असतात. व्यवसायात जोखीम पत्करायला ते नेहमीच तयार असतात. नवीन योजनांवर काम करून नफा कमावतात. आव्हाने स्वीकारतात आणि कोणत्याही परस्थितीत जिंकण्याचा प्रयत्न करतात. बँकिंग, शिक्षण, प्रशिक्षण या क्षेत्रात करिअर करू शकतात. या व्यक्तींना अर्थशास्त्र आणि संगीताचेही चांगले ज्ञान असते, असे सांगितले जाते.
- सदर माहिती सामान्य गृहितके आणि ज्योतिषीय मान्यतांवर आधारित असून, तुमच्या मूलांकाविषयी जाणून घेण्यासाठी तज्ज्ञ व्यक्तींचा सल्ला उपयुक्त ठरू शकेल, असे सांगितले जाते.