धारूर
(जि.बीड) : येथील अजीजपुरा भागात राहणाऱ्या एका दांपत्याचे निधन झाले. उपचार घेत असलेल्या पत्नीचे निधन झाल्याचे समजताच पतीचे हृदयविकाराच्या झटक्याने निधन झाले. शनिवारी सकाळी या दांपत्यावर अत्यंसंस्कार करण्यात आले.
धारुर शहरातील शेख रहिम शेख लाल यांच्या पत्नी हसीना (वय ५४) यांना उपचारासाठी लातूर येथील खासगी दवाखान्यात चार दिवसांपूर्वी दाखल करण्यात आले होते. त्यांचे उपचार सुरू असताना शुक्रवारी दुपारी चारच्या सुमारास निधन झाले. यावेळी दवाखान्यात उपस्थित असलेले पती शेख रहिम (वय ५८) यांना पत्नीचे निधन झाल्याचे कळताच तीव्र हृदयविकाराचा झटका आला. या धक्क्यात त्यांची प्राणज्योत मावळली. शेख रहिम हे शहरातील नामांकित व्यापारी होते. मितभाषी स्वभावामुळे ते सर्वपरिचित होते. पत्नीवर नितांत प्रेम असणाऱ्या रहिम यांना पत्नी निधनाचे दु:ख सहन न झाल्याने हृदयविकाराचा धक्का आला यातच त्यांचे निधन झाले. शहरात प्रथमच अशी हृदयद्रावक घटना घडली असून, शहरात हळहळ व्यक्त केली जात आहे. १६ जानेवारी रोजी सकाळी ११.३० वाजता मयत दांपत्यावर धारुर शहरातील तहसील कार्यालयासमोरील तकीया तलाव परिसरातील कब्रस्तानमध्ये शेकडोंच्या उपस्थितीत अंत्यसंस्कार करण्यात आले.