अंबाजोगाई : दिवसेंदिवस वाढत्या महागाईने सर्वसामान्य लोकांचे जगणे सध्या कठीण झाले आहे. रोजच्या मिळकतीत जीवन जगणे तारेवरची कसरत होत आहे.
इंधन व गॅस दरवाढीने कुटुंबाचा आर्थिक बोजवारा उडाला आहे. शेतकरी वर्ग इंधन दरवाढीच्या चक्रात सापडला असून, इतरही खर्चाची झालेली दरवाढ डोईजड होत आहे. सरकारने भरमसाट कर लावत सामान्यांचे आर्थिक बजेट बिघडवले आहे. अमर्याद इंधन दरवाढ झाल्याने गोरगरीब भरडला जात आहे. जीवनावश्यक वस्तूंसह इतरही पूरक वस्तूंच्या किमती इंधन दरवाढीच्या कारणाने वाढल्या आहेत. सरकार गरिबांची आहे, का मोजक्याच धनिकांचे? असा प्रश्न चर्चेत आला आहे. राजकारणी कोणत्याही पक्षाचा असो. मात्र, इंधन दरवाढ सगळ्यांचे दुखणे झाले आहे. एवढी दरवाढ यापूर्वी कधीच अनुभवली नव्हती. दोनशे रुपये मजुरी करणारा मजूर मात्र जगताना पावलोपावली शासनाला शाप देत आहे. डिझेल महागल्याने शेतकऱ्यांच्या ट्रॅक्टरच्या साहाय्याने होणाऱ्या कामांच्या दरातसुद्धा वाढ झाली आहे. ही दरवाढ सहन करावी लागत आहे.
सर्वाधिक फटका शेतकऱ्यांना
डिझेलचे दर गेल्या काही दिवसां पासून सातत्याने वाढत आहेत. यामुळे सर्वसामान्यांना मोठा फटका बसत असून महागाई तीन पटीत वाढ झाली आहे. असे असतानाही शेतकरी मोठ्या उमेदीने खरीप हंगामाच्या तयारीला लागला असला तरी मशागतीचे दर वाढले असल्याने महागाईचा सर्वाधिक फटका शेतकऱ्यांना बसत आहे. मजुरीचे दरही महागाईमुळे वाढले आहेत.
सरकारने तेलाचे दर कमी करावेत. शेतीला ट्रॅक्टरशिवाय पर्याय नसल्याने इंधन दरवाढ परवडणारी नाही. रोजच्या खर्चात मोठी वाढ झाल्याने जगणे मुश्कील होत आहे. शेती उत्पादन खर्चात भरीव वाढ झाली आहे. ही शेतकऱ्यांना अजिबात परवडणारी नाही.
पीक कर्जही अपुरे
शेतकऱ्यांना खरीप व रब्बी हंगामात पेरणीपूर्व पीक कर्ज देण्याची सुविधा शासनाने उपलब्ध करून दिली आहे. अत्यंत कमी व्याजदराने हे कर्ज शेतकऱ्यांना उपलब्ध करून द्यावे. अशा सूचना शासन देते. मात्र प्रत्यक्षात बँकेत शेतकऱ्यांची किरकोळ रकमेचे कर्ज देऊन बोळवण केली जाते. अन्यथा भरमसाट कागदपत्र किंवा हेलपाटे मारण्यापेक्षा जे मिळेल ते घ्यायचे. अशी वेळ शेतकऱ्यांवर आणली जाते.