बीड : मराठा समाजाच्या आरक्षणासाठी जालना जिल्ह्यात मागील चार दिवसांपासून आंदोलन सुरू आहे. शुक्रवारी दुपारनंतर या आंदोलनाला हिंसक वळण प्राप्त झाले. आंदोलक आणि पोलिसांमध्ये यांच्यामध्ये वाद झाल्यानंतर लाठीचार्ज करण्यात आला. सायंकाळी राष्ट्रीय महामार्गावरील बसही जाळण्यात आला. त्यानंतर छत्रपती संभाजीनगर, जालन्याकडे जाणारे रस्ते बंद करण्यात आले, तर इकडे बीडमध्येही याचे पडसाद उमटले. मराठा समाजाच्या वतीने जिल्हाधिकाऱ्यांना निवेदन देत मागण्या मान्य करण्याची मागणी केली. आंदोलकांवर झालेल्या लाठीचार्जचा निषेध करण्यात आला. शनिवारी बीड बंदची हाक देण्यात आली आहे.
अंतरवाली सराटी (ता.अंबड, जि.जालना) येथे मनोज जरांगे यांच्या नेतृत्वाखाली मागील चार दिवसांपासून मराठा आरक्षणासह इतर मागण्यांसाठी आमरण उपोषण सुरू आहे. याला राज्यभरातून पाठिंबा दिला जात आहे. या उपोषणाच्या चौथ्या दिवशी मनोज जरांगे व त्यांच्या सहकाऱ्यांनी उपचार घ्यावेत, यासाठी गुरुवारी रात्रीपासूनच प्रशासनाचे प्रयत्न सुरू होते. शुक्रवारी दुपारीही मोठ्या फौजफाट्यासह प्रशासकीय अधिकाऱ्यांनी आंदोलनस्थळी धाव घेतली; परंतु नकार मिळाला. याचवेळी आंदोलक व पोलिसांमध्ये बाचाबाची झाली. त्यानंतर पोलिसांनी लाठीचार्ज केला, तसेच आंदोलकांनीही दगडफेक केली. यात पोलिसांसह आंदोलक, सामान्य नागरिक जखमी झाले. सायंकाळच्या सुमारास सोलापूर-धुळे राष्ट्रीय महामार्गावरून धावणाऱ्या बसही जाळण्यात आला. त्यामुळे तणावाचे वातावरण निर्माण झाले होते.
दरम्यान, या आंदोलनाचे पडसाद बीड जिल्ह्यातही उमटले आहेत. शुक्रवारी दिवसभर गेवराई शहरात कडकडीत बंद पाळण्यात आला होता. त्यानंतर सायंकाळच्या सुमारास मराठा समाजाच्या वतीने जिल्हाधिकाऱ्यांना निवेदन देण्यात आले. आज बीड बंदची हाकही देण्यात आली आहे. यात सर्व संघटना सहभागी होणार असल्याचे सांगण्यात आले. नागरिकांनी सहकार्य करावे, असे आवाहनही मराठा क्रांती मोर्चाच्या वतीने करण्यात आले आहे.
बीड पोलिसांचीही धाव
आंदोलन चिघळल्याचे समजताच बीड पोलिसांनीही अंतरवाली सराटी गावात धाव घेतली. जालना, छत्रपती संभाजीनगर पोलिसांशी समन्वय साधून परिस्थिती नियंत्रणात आणली. अपर पोलिस अधीक्षक सचिन पांडकर यांच्यासह ७० ते ८० पोलिसांचा फौजफाटा रात्री उशिरापर्यंत जालना जिल्ह्यात बंदोबस्तासाठी तैनात होता. पोलिस अधीक्षक नंदकुमार ठाकूर प्रत्येक परिस्थितीचा आढावा घेत होते. दरम्यान, पांडकर यांच्या हाताला दगड लागला असून तीन टाके पडल्याची माहिती आहे. इतरही पोलिस किरकोळ जखमी झाले आहेत.