लग्नाचा मुहूर्त ठरला, विधी सुरू झाले आणि पोलीस दाखल; लग्नाच्या मंडपातून नवरदेव गेला पळून!

Beed: बीडमधील एका हृदयद्रावक घटनेत पोलिसांनी वेळेवर धाव घेत एका १७ वर्षीय विद्यार्थिनीचे आयुष्य उद्ध्वस्त होण्यापासून वाचवले आहे.

सोमनाथ खताळलोकमत न्यूज नेटवर्क बीड: दहावीत ८५ टक्के गुण मिळवून विज्ञान शाखेत शिक्षण घेणाऱ्या १७ वर्षीय विद्यार्थिनीचा बालविवाह रोखण्यात पोलिसांना गुरुवारी यश आले. बीड तालुक्यातील कपिलधार येथे विवाहसोहळा सुरू असतानाच पोलिस व सामाजिक कार्यकर्त्यांचे पथक घटनास्थळी दाखल झाले. पोलिसांना पाहताच नवरदेव, नातेवाईक व वऱ्हाडी मंडळींनी मंडपातून पळ काढला. 

१८ डिसेंबर २०२५ रोजी एका महाविद्यालयीन तरुणीचे भरदिवसा अपहरण झाल्याने परिसरात भीतीचे वातावरण होते. आपल्या मुलीलाही एक मुलगा त्रास देत असल्याने, तिच्याबाबतही अशीच दुर्घटना घडेल या भीतीने आईने मुलीचे लग्न लावून देण्याचा निर्णय घेतला. वडील बेरोजगार असल्याने कुटुंबातील असुरक्षिततेची भावना या निर्णयामागे कारणीभूत ठरली.

कपिलधार देवस्थानवर यापूर्वीही बालविवाह

गुरुवारी दुपारी कपिलधार देवस्थान येथे विवाहाचा मुहूर्त होता. ही माहिती सामाजिक कार्यकर्ते तत्त्वशील कांबळे यांनी अनैतिक मानवी वाहतूक प्रतिबंधक कक्षाला कळवली. पोलिसांनी मुलीला ताब्यात घेत गुन्हा दाखल करण्याची प्रक्रिया सुरू केली. कपिलधार देवस्थानात यापूर्वीही बालविवाह रोखले गेले आहेत. वयाचा पुरावा न तपासता विवाहास अप्रत्यक्ष परवानगी दिली जात असल्याचा आरोप असून, देवस्थान समितीची चौकशी करून कडक कारवाईची मागणी सामाजिक कार्यकर्त्यांनी केली आहे.