बीड : एका गुंतवणुकीच्या स्किममध्ये जादा परताव्याचे आमिष दाखवून बीड शहरातील एका विमा प्रतिनिधीची तब्बल २१ लाख ३० हजार रुपयांची फसवणूक झाल्याचा प्रकार समोर आला आहे. या प्रकरणी बीड शहर पोलिस ठाण्यात एका व्यक्तीविरोधात गुन्हा नोंद करण्यात आला आहे.
अण्णासाहेब राठोड (रा. बंगाली पिंपळा, माळीवेस, बीड) असे फसवणूक झालेल्या विमा प्रतिनिधीचे नाव आहे. राठोड यांची ओळख कुणाल भाऊसाहेब चव्हाण (रा. चासनळी, जि. अहिल्यानगर; सध्या रा. पुणे) या व्यक्तीसोबत झाली होती. कुणाल चव्हाण याने अण्णासाहेब राठोड यांना एका विशिष्ट स्किममध्ये पैसे गुंतवल्यास जादा परतावा मिळेल, असे आमिष दाखवले. तसेच, विमानाचे तिकीट काढून देण्याचेही सांगितले. कुणालच्या बोलण्यावर विश्वास ठेवून राठोड यांनी २७ डिसेंबर २०२४ पासून त्याच्याकडे गुंतवणूक करण्यास सुरुवात केली. ४ जून २०२५ पर्यंत राठोड यांनी कुणालकडे एकूण २१ लाख ३० हजार रुपयांची गुंतवणूक केली होती.
मात्र, नंतर कुणाल याने सांगितल्याप्रमाणे कोणताही परतावा दिला नाही आणि मुद्दल रक्कमही परत केली नाही. आपली फसवणूक झाल्याचे लक्षात आल्यानंतर अण्णासाहेब राठोड यांनी बीड शहर पोलिस ठाण्यात धाव घेऊन तक्रार दिली. पोलिसांनी या तक्रारीवरून गुन्हा नोंद केला असून, या प्रकरणाचा अधिक तपास करत आहेत. अशा फसवणाऱ्या आमिषांपासून नागरिकांनी सावध राहण्याचे आवाहन पोलिसांनी केले आहे.
Web Summary : A Beed insurance agent was duped of ₹21.3 lakh after being lured with high returns on an investment scheme. Police have registered a case against the accused and are investigating the fraud. Citizens are urged to beware of such schemes.
Web Summary : बीड के एक बीमा एजेंट को निवेश योजना पर उच्च रिटर्न के लालच में ₹21.3 लाख की ठगी हुई। पुलिस ने आरोपी के खिलाफ मामला दर्ज कर धोखाधड़ी की जांच कर रही है। नागरिकों को ऐसी योजनाओं से सावधान रहने का आग्रह किया गया है।