आष्टी / कडा : तालुक्यातील आष्टी, कडा, धानोरा येथे रविवारी एकाच रात्री १४ दुकाने फोडून चोरट्यांनी धुमाकुळ घातला. यामुळे परिसरात भीतीचे वातावरण पसरले आहे.
९ सप्टेंबर रोजी मध्यरात्री चोरट्यांनी कडा बाजारपेठेतील पूनम कलेक्शन (रू. १४०००), दत्त कलेक्शन व गिफ्ट आर्टिकल्स (रु.३४०००), शिवम मेडिकल (रु.३०००), रंजन क्लॉथ स्टोअर्स (रू.१७०००), क्लासिक फूटवेअर (रु.१०७००) या दुकानातुन साहित्य व रोख रक्कम चोरून नेली. स्टार कलेक्शन, सूर्या वाईन शॉप, जगदंबा इलेक्ट्रिक, आर्या सलून या दुकानांचे शटर तोडून नुकसान केले.
धानोरा येथील नगर- बीड मार्गावरील अनघा मेडिकल स्टोर मधून एक हजार रुपयांची सौन्दर्य प्रसाधने चोरट्यांनी चोरली. आष्टी येथील गणपती मंदिरासमोरील तोडकर कन्स्ट्रक्शन कार्यालयातील संगणक व इतर साहित्य असा रु.६८ हजार ५००, रामदेव फर्निचर अँड हार्डवेअरमधून रोख १२००० रुपये व इतर साहित्य, साई मेडिकल फोडून १२ हजार व माऊली आॅप्टिकल या दुकानातून ३ हजाराचा ऐवज अज्ञात चोरट्यांनी लांबविला. चोरांनी लोखंडी गजाच्या सहाय्याने सर्व शटर उचकटून रक्कम व साहित्य चोरुन नेले.
कडा, आष्टी व धानोरा येथे अप्पर पोलीस अधीक्षक वैभव कलूबर्मे, उप विभागीय पोलीस अधिकारी मंदार नाईक, पोनि सय्यद शौकतअली, सपोनि भुतेकर, बारवकर यांनी भेट दिली. तसेच गुन्हा दाखल केला आहे.