माजलगाव : तालुक्यातील गंगामसला येथे वाळूमाफियांनी आता नवीन शक्कल लढवली आहे. कोरोनाच्या पार्श्वभूमीवर गावांत इतरांना प्रवेशबंदी करून आतमध्ये दररोज दिवस-रात्र गोदावरी नदीपात्रातून प्रचंड वाळू उपसा करण्यात येत आहे. इकडे गावात नवागतास प्रवेशबंदी केल्याने कोरोना रुग्ण प्रमाण शून्य असल्याचे सांगून काही लोक पाठ थोपटून घेत असले तरी दुसरीकडे कोरोनाच्या नावावर वाळू चोरी होत असल्याचे समोर येत आहे. त्यामुळे शासनाच्या तिजोरीवर संगनमताने डल्ला मारण्यात येत असल्याचे स्पष्ट दिसून येत आहे.
गंगामसला येथील गोदावरी नदीच्या विस्तीर्ण पात्रात प्रचंड वाळू असल्याने चोरट्या वाळू वाहतुकीच्या धंद्यात काही लोक उतरले आहेत. दररोज दिवस-रात्र तलाठी, मंडळ अधिकारी व तहसीलदार यांच्याशी संगनमत करून किमान १५ ट्रॅक्टरमध्ये वाळू उपसा करून त्याची वाहतूक करून विक्री केली जाते. असा हा गोरखधंदा सर्रासपणे सुरू असताना गावात कोणी येत असेल तर त्याची माहिती म्हणून पाथरी फाटा, पवारवाडी, मोठेवाडी कॉर्नर, छोटेवाडी, मोगरा फाटा, ३३ केव्ही केंद्र, खरात आडगाव फाटा, मोठेवाडी कॅनॉल व गावातील प्रवेश कमानीजवळ आदी ठिकाणी माफियांनी खबरे ठेवले आहेत. हे खबरे अनोळखी कोणी येत असेल किंवा वाहन येत असेल तर माफियांना माहिती पुरवतात. राष्ट्रीय महामार्गावरील गावाच्या प्रवेशद्वाराला एक कमान आहे. तेथूनच गावात प्रवेश मिळतो. तेथे दररोज रात्री काही लोक बसतात. माफियांनी अधिकाऱ्यांना संगनमताने मॅनेज केले असून त्यांच्या आर्थिक तडजोडीबरोबर त्यांच्या चालकाला सुद्धा टीप देण्यासाठी रक्कम दिली जात असल्याचे बोलले जाते. येथील वाळूमाफियांचा कर्ता-करविता एक ‘काका’ आहे, तोच सर्व खबऱ्यांचे, अधिकारी, पोलीस यांच्याबरोबर कमानीजवळील एका हॉटेलमध्ये बसून मधुर संबंध साधून असतो. गावचा तलाठीदेखील नदीपात्रात खड्डे करून वाळू चोरी होत असताना गप्प का, असा प्रश्न उपस्थित होत आहे.
माफियांना अभय
मागील कित्येक महिन्यांपासून वाळूची चोरी सुरू असतानाही पोलीस किंवा महसूल पथकाकडून या गावात एकही गुन्हा किंवा दंडाची कारवाई झालेली नाही. एकीकडे कवडगावथडी येथे जिल्हाधिकाऱ्यांचे विशेष पथक अर्ध्या रात्री मोठी कारवाई करते. मात्र, या ठिकाणी कारवाई होत नाही, त्यावरून या माफियांना मोठे अभय मिळते, असे दिसून येते.
कारवाईसाठी पथके नेमली
आम्ही गोदावरी नदीपात्रातील गावांमध्ये अवैधरीत्या होणारा वाळू उपसा रोखण्यासाठी पथकांची नेमणूक केलेली आहे. त्यांच्यामार्फत वाळू चोरांवर कारवाई करण्यात येत आहे. ---वैशाली पाटील, तहसीलदार
===Photopath===
230521\3608purusttam karva_img-20210523-wa0036_14.jpg