हेडलाइटविना कार काय कोणतेही रस्त्यावरचे वाहन पूर्ण होऊ शकत नाही. रात्रीच्यावेळी प्रवास करताना अतिशय गरजेचा घटक म्हणजे कारचा हेडलॅम्प. हेडलॅम्पचे आज विविध प्रकार नवनव्या तंत्रज्ञानाने अविष्कृत केलेले दिसतात. त्याचे आकार, त्याचे रूप, त्याचा विशिष्ट पद्धतीने पडणारा प्रकाश आदी सारे घटक या हेडलाइटला सातत्याने नवीनता देतद आहेत. काळानसार सतत घडणारे बदल पाहून अचंबित व्हायला होतेच पण त्याच्या किंमती पाहूनही डोळे लकलकतात. प्रोजेक्टर लाइट हा भारतातील काही निवडक कार्सना बसवण्यात येणारा प्रकार आहे.
एलईडी हा प्रकारही आता काहीसा मागे पडला आहे. प्रोजेक्टर लाइटने आपली कार ग्राहकांना अधिक आकर्षित करू शकते असा विश्वासही अनेक कंपन्यांना वाटू लागला आहे. त्यामुळेच अगदी हॅचबॅकलाही प्रोजेक्टर लाइट देत काही कंपन्यांनी त्या कारच्या वरच्या श्रेणीमध्ये ग्राहकांना या प्रोजेक्टर लाइटची सुविधा उपलब्ध करून दिली आहे. हा प्रोजेक्टर लाइट नेमका काय आहे असा प्रश्न अनेकांना पडतो. कारण एकंदर अन्य हेडलाइट्सच्या तुलनेत बाजारात आणलेला हा एक नवा प्रकार आहे.
नावाप्रमाणेच हा लाइट आहे. सिनेमाचा प्रोजेक्टर जसा तुमच्यापुढे चित्रपट भव्य स्वरूपात व विशिष्ट प्रमाणात पण प्रमाणबद्धतेने प्रकाशाच्या खेळातला चित्रपट म्हणजे फिल्मचे रूप सादर करतो, त्याचप्रमाणे या प्रोजेक्ट लाइटचे आहे. यामध्ये प्रोक्टरच्या वाटीत वा खोबणीमध्ये एक बल्ब बसवलेला असतो, त्याच्यामागे रिफ्लेक्टर असतो व तो रिफ्लेक्टर समोरच्या भिंगामधून रस्त्यावर तुम्हाला प्रकाशझोत देतो, अशी ही साधी व्याख्या आहे.यामध्ये अनेक प्रकारची भिंगे असू शकतात, त्या आधारित उपकरणेही असू शकतात.
कारच्या हेडलाइटच्या या उपकरणामध्ये क्रोम प्लेट केलेला रिफ्लेक्टर एका वाटीसारख्या खोबणीमध्ये असतो व त्याच्यामध्ये बसवलेल्या बल्बचा प्रकाश रिफ्लेक्टरवर पडून तो रिफ्लेक्टरचा प्रकाश समोरच्या भिंगामधून बाहेर पडून रस्त्यावर पडतो. त्या भिंगामधून रस्त्यावर पडलेला प्रकाश अधिक प्रखर परंतु, तो एका चौकटीच्यामध्ये पडतो, त्याच्या सीमेबाहेर तो पसरत नाही. त्यामुळे समोरच्या वाहनालाही त्याचा त्रास होत नाही. वर्तुळाकार वा चौकोनी अशा आकारात तो रस्त्यावर पडत असल्याने त्याचा प्रकाशझोत अधिक प्रखल व एकवटलेला असतो, साहजिकच त्यामुळे रस्ता अधिक प्रकाशमान होत असतो. हेच प्रोजेक्टर हेडलॅम्पचे वैशिष्ट्य म्हणावे लागेल. यामघ्ये एचआयडी प्रकारचे बल्ब वापरले जातात.